13.04.2026 | 22:44
Դատարանը մերժել է Թրամփի հայցը ընդդեմ The Wall Street Journal-ի՝ Էփշտեյնի համար բացիկի շուրջ զրպարտության գործով
Սանահին կայարանում կառուցվում է կախովի հետիոտնային անցում․ ասուլիս՝ աղետի գոտում իրավիճակի մասին․ ՏԵՍԱՆՅՈՒԹ
Տնտեսություն
30.05.2024 | 17:34
Բազմաբնակարան շենքերի բակերը մաքրվում են տիղմից ու ցեխակույտերից, ժամանակավոր փոքր կամրջակներ են կառուցվում․ այս մասին Լոռու մարզպետն ու ՆԳՆ փրկարար ծառայության պետն այսօր խոսել են Ալավերդու համայնքապետարանի տեղեկատվական կենտրոնում հրավիրված ասուլիսում։ Լոռու մարզպետ Արամ Ղազարյանի խոսքով՝ ուշադրության կենտրոնում է միջպետական ճանապարհների վերականգնումը։ Ըստ նրա՝ Ախթալայի կամրջի վրա հետիոտնային անցման կառուցմամբ վերականգնվում է կապը Ախթալա, Շամլուղ, Մեծ Այրում, Փոքր Այրում, Քարկոփ, Ճոճկան, Բենդիկ բնակավայրերի հետ։
Այս ամենին զուգահեռ շարունակվում են նաև Ալավերդու Թումանյան փողոցի, Սանահին կայարան թաղամասի՝ տիղմից մաքրման աշխատանքները։
Արամ Ղազարյանի տեղեկացմամբ՝ Սանահին թաղամասում կառուցվում է հետիոտնային կախովի կամուրջ, որպեսզի կապ հաստատվի այն բնակավայրերի հետ, որտեղից փրկարարների օգնությամբ իրականացվել է տարհանում, իսկ այնտեղ մնացած անձանց համար ճոպանների միջոցով պարբերաբար հասցվում է սնունդ և առաջին անհրաժեշտության պարագաներ։
«Հարավկովկասյան երկաթուղու գործընկերների հետ ձեռք է բերվել պայմանավորվածություն, որպեսզի համապատասխան տեխնիկա մտցվի Քարկոփ, որպեսզի մաքրման աշխատանքներն իրականացվեն ավելի ինտենսիվ կերպով: Շատ բնակավայրերում վերականգնվել է էլեկտրականությունն ու գազամատակարարումը» ,- ներկայացրեց նա։
Իսկ Փրկարար ծառայության պետ Կամո Ցուցուլյանն ասաց, որ Սանահին թաղամասում և հարակից տարածքներում 141 բնակիչ կա, որոնց հետ կապը կտրվել է հեղեղումների հետևանքով։ Նա նշեց, որ այդ հատվածքներում փոքր կամրջակներ են կառուցում, որ մարդիկ մի ափից մյուսը տեղափոխվեն, նրանց ևս ճոպանների միջոցով են սնունդ հասցնում։
Հիշեցնենք` մայիսի 26-ի տեղատարափ անձրևներից հետո Լոռու և Տավուշի մարզերում Դեբեդ, Աղստև և Տաշիր գետերի վարարման հետևանքով 4 մարդ է մահացել։ Քանդվել են ճանապարհներ, տներ ու ավտոմեքենաներ են ջրածածկ եղել, փլուզվել են կամուրջներ։
Որոշում է կայացվել Լոռու և Տավուշի մարզերի տուժած բնակավայրերը հայտարարել աղետի գոտի և մարզպետարաններին 300 մլն դրամ հատկացնել հեղեղումների հետևանքները վերացնելու համար։ Նշենք, որ աղետի գոտին ներառում է 6 համայնք Լոռիում, ևս 3-ը՝ Տավուշում։
Մանրամասները՝ տեսանյութում։
