15.01.2025 | 23:34
Իսրայելն ու ՀԱՄԱՍ-ը հրադադարի համաձայնագիր են ստորագրել
Կրեմլը սադրում է Ադրբեջանին հարձակվել ՀՀ վրա, ցնցումներ լինեն՝ Փաշինյանից ազատվի, ՀՀ-ն Արևմուտքին չմերձենա․ Գարեգին Միսկարյան․ ՏԵՍԱՆՅՈՒԹ
Քաղաքականություն
29.05.2024 | 20:04
ՌԴ Պետդումայի պատգամավոր, «հայասեր» գործչի համբավ ունեցող Կոնստանտին Զատուլինը ОРТ-ի եթերում հայտարարել է․ «Պարոն Փաշինյանի՝ ամեն օր ՀՀ-ում իշխանության մնալը ՌԴ-ի նվաստացումն է Անդրկովկասում և Արևելքում»։ Զատուլինն նաև նշել է, թե ՌԴ-ին ուղղված քննադատությունները տեղին չեն՝ «ՌԴ-ի շնորհիվ՝ ՀՀ-ն ունի պետականություն»։
Իսկ ՀՀ վարչապետ Նիկոլ Փաշինյանը օրերս պնդեց, որ ՀԱՊԿ-ի երկու պետություն Հայաստանի դեմ պատերազմի նախապատրաստմանը մասնակցել են։ Նա պատասխանում էր Լուկաշենկոյի այն բացահայտմանը, որ Բելառուսն ու Ադրբեջանը նախապես քննարկել են 2020 թվականի պատերազմը, դրա ելքը։ Հիշեցնենք, որ 2011-2020 թվականներին ՌԴ-ն և Բելառուսը մատակարարել են Ադրբեջանի զենքի 67%-ը։
«Ժողովրդավարական հարթակ» հիմնադրամի տնօրեն Գարեգին Միսկարյանը Factor TV-ի եթերում ասում է, որ քննադատելի է ՀԱՊԿ-ի անդամ երկու պետությունների նման մեղադրանք ներկայացնելը, սակայն ՀԱՊԿ-ից դուրս չգալը։ ՀՀ իշխանության այս դիրքորոշումը նա գնահատում է որպես զգուշավոր քաղաքականություն։ Միսկարյանը, անդրադառնալով ՌԴ-ից հնչած սուր հակադարձումներին, նշում է․
«Նիկոլ Փաշինյանը հրաժարվեց դեպի ՌԴ շրջվել, որը ենթադրում է ավտորիտարիզմ, և Կրեմլը այս ցնցումներով ուզում է ազատվել ՀՀ այս իշխանությունից։ Բացի այդ, Փաշինյանը հրաժարվեց ՌԴ-ի պահանջը կատարել՝ «Զանգեզուրի միջանցք» չտվեց, կան նաև այլ պահանջներ, որ չի կատարում, ինչը իրապես հեղինակազրկեց Պուտինին։ Եվ հիմա Կրեմլը սադրում է Ադրբեջանին՝ հարձակվել ՀՀ-ի վրա, որպեսզի ներքաղաքական ցնցումներ լինեն և Փաշինյանից ազատվի, որի հետևանքը կլինի նաև այն, որ ՀՀ-ն Արևմուտքին չմերձենա»։
Միսկարյանը նշում է, որ Ռուսաստանն այս ընթացքում Հայաստանի դեմ լայն գործիքակազմ է կիրառել՝ ներքաղաքական ցնցումներ, պատերազմներ, Արցախի հայաթափում, սակայն չի կարողացել իշխանափոխություն իրականացնել, իշխանության բերել իրեն լոյալ ուժերի։ Ըստ նրա՝ հայ-ռուսական հարաբերությունները պետք է ենթարկվեն լրջագույն փոփոխությունների, որոնց նպատակը ՀՀ սուվերենության բարձրացումը պիտի լինի։
Հարցազրույցն ամբողջությամբ՝ տեսանյությում։
Ռոբերտ Անանյան
