28.03.2026 | 23:47
ՔՊ քվեարկություն․ առաջատար 10-յակը և ամենաքիչ ձայներ հավաքած թեկնածուն
Կարող էին ազգային հերոսի կոչում տալ․ Նինա Կարապետյանցը՝ ոստիկանության զորքերի հրամանատարին գեներալ-մայորի կոչում շնորհելու մասին
Քաղաքականություն
28.05.2024 | 18:47
ՆԳՆ ոստիկանության զորքերի հրամանատար, ոստիկանապետի տեղակալ, գնդապետ Հայկ Բաբայանին նախագահ Վահագն Խաչատուրյանն այսօր շնորհեց գեներել-մայորի զինվորական կոչում։ Պարգևատրումը սոցիալական ցանցերում քննադատության է արժանացել՝ հաշվի առնելով ոստիկանների կողմից բիրտ ուժի կիրառումը հատկապես «Տավուշը հանուն հայրենիքի» շարժման բողոքի ակցիաների ընթացքում։
Իրավապաշտպան Նինա Կարապետյանցը Factor.am-ի հետ զրույցում ասաց, որ «Եռաբլուրում» 2022-ին տեղի ունեցած դեպքերից հետո, երբ զոհված զինվորների ծնողներին բիրտ ուժով այնտեղից հեռացրած ոստիկանները պատասխանատվության ենթարկվելու փոխարեն մեդալներ ու կոչումներ ստացան, այս մոտեցումը զարմանալի չէ։
«Ես կարծում եմ, որ համեստություն են արել, գեներալ-մայորի կոչումը բավարար չէ այն գործողությունների համար, որոնց ականատես եղանք բոլորս։ Կարծում եմ՝ կարող էին նաև ազգային հերոսի կոչում տալ, դա ավելի համարժեք կլիներ այն տրամաբանության մեջ, որով առաջնորդվում է այսօրվա իշխանությունը։ Սա այն վարքագիծն է, որին մենք ականատես ենք եղել տասնամյակներ շարունակ, երբ իշխանությանը հավատարիմ ծառայող տարբեր պաշտոնյաներ ստացել են և՛ կոչումներ, և՛ ավելի բարձր ուսադիրներ։ Որևէ իշխանություն գործող իշխանությունների նման չի արժեզրկել կոչումների, ուսադիրների արժեքը»,- ընդգծեց իրավապաշտպանը։
Ի դեպ, այսօր Սարդարապատում սևբերետավորները, գեներել-մայորի զինվորական կոչում ստացած Հայկ Բաբայանի գլխավորությամբ, խոչընդոտել են Գարեգին Բ կաթողիկոսի և լրագրողների մուտքը հուշահամալիր։ Թե ինչու է խոչընդոտվում լրագրողների աշխատանքը և թույլ չեն տալիս բարձրանալ հուշահամալիր, այս հարցին ի պատասխան Հայկ Բաբայանը լրագրողներին հորդորել է դիմել վարչապետի արարողակարգի պատասխանատուին։
Արփի Հակոբյան
