Ադրբեջանի ընդդիմությունը բողոքի ակցիա է անցկացրել

Ադրբեջանի ընդդիմադիր կուսակցություններն Անկախության օրվա կապակցությամբ ցույց են անցկացրել Ադրբեջանի Հանրապետության հիմնադրի Մամեդ Էմին Ռասուլզադեի հուշարձանի մոտ։ Տեղական լրատվամիջոցները հայտնում են, որ երկու առաջատար ընդդիմադիր ուժերը՝ «Մուսավաթ» կուսակցությունը և Ժողովրդավարական ուժերի ազգային խորհուրդը հանրահավաքներ են անցկացրել։

Իր ելույթում «Մուսավաթ»-ի ղեկավար Իսա Ղամբարն իր ելույթում ասել է, որ երկրում հաստատվել է «անձնական իշխանության ռեժիմ» և ոտնահարվում են մարդու ազատություններն ու իրավունքները։

«Հարյուրավոր քաղբանտարկյալներ են բանտերում, «Մուսավաթ»-ը կշարունակի պայքարել Ադրբեջանում հավասարության, ժողովրդավարության, զարգացման համար, չնայած այն ամենին, ինչ թշնամիներն ասում են կուսակցության մասին»,- ասել է Ղամբարը՝ նշելով, որ կուսակցությունը շարունակելու է Ռասուլզադեի գիծը՝ Թուրքիայի հետ Ադրբեջանի մերձեցման։

Իր հերթին, Ժողովրդական ճակատ կուսակցության նախագահ Ալի Քերիմլին իր կողմնակիցների հանրահավաքում նույնպես կոչ է արել պայքարել Ադրբեջանում ազատության, մարդու իրավունքների և ժողովրդավարության համար։ Նա ասել է, որ ակցիայի նախօրեին ոստիկանությունը «կանխարգելիչ միջոցներ» է ձեռնարկել կուսակցության ակտիվիստների նկատմամբ՝ փորձելով թույլ չտալ նրանց մասնակցել հանրահավաքին։

Բողոքի ցույցերին մասնակցել է մի քանի հազար մարդ։ Ոստիկանությունը չի միջամտել։

Հավելենք, որ օրերս «Մուսավաթ»-ը մասնակցում էր Ադրբեջանի նախագահականի կողմից կազմակերպված իշխանությունների ու տարբեր կուսակցությունների ներկայացուցիչների հանդիպմանը, որը քննադատություններ է առաջացրել։ Ժողովրդական ճակատը հանդիպմանը չէր մասնակցել։

Նշենք, որ Բաքվի գործադիր իշխանությունն օրերս կրկին մերժել էր ընդդիմադիր ուժերին միավորող Ժողովրդավարական ուժերի ազգային խորհրդի դիմումը՝ մայիսի 19-ին հանրահավաք անցկացնելու վերաբերյալ։ Ավելի վաղ, Բաքվի գործադիր իշխանությունը երկու անգամ մերժել էր արտոնել նախ՝ ապրիլի 21-ին, ապա՝ մայիսի 5-ին նշանակված հանրահավաքները։

Ընդդիմությունը ցանկանում է հանրահավաք անցկացնել քաղբանտարկյալների ազատ արձակման, ընտրական բարեփոխումների, Ադրբեջանի և ԵՄ-ի միջև նոր համաձայնագրի ստորագրման, ցամաքային սահմանների բացման, աշխատավարձերի, կենսաթոշակների բարձրացման և այլ պահանջներով։

Էմմա Չոբանյան