Փաշինյանից դժգոհ լինելով՝ մարդիկ հների վերադարձ չեն ուզում, չեն խաբվում նոր փաթեթավորմանը, այլապես փողոցում կլինեին․ Նինա Կարապետյանց․ ՏԵՍԱՆՅՈՒԹ

Վարչապետի հրաժարականը պահանջող «Տավուշը հանուն հայրենիքի» շարժման անդամներն ու աջակիցներն այսօր առավոտից Երևանում դարձյալ բողոքի ակցիաներ էին  իրականացնում՝ փորձելով փակել մայրաքաղաքի կենտրոնական հատվածի փողոցները: Ըստ ՆԳՆ-ի՝ 285 մարդ բերման է ենթարկվել, այնուհետև՝ ազատ արձակվել։

Ընդդիմադիր «Հայաստան» խմբակցության պատգամավոր Աշոտ Սիմոնյանի հետ տեղի ունեցած միջադեպով ՆԳՆ-ում ծառայողական քննություն է նշանակված: Ասել են, որ քննությունից հետո կկարողանան հստակեցնել, թե քանի ծառայողի լիազորություն կկասեցվի։

Կադրերում երևում է, թե ինչպես են մի խումբ ոստիկաններ պատգամավորին քաշքշում, լսվում են սեռական բնույթի հայհոյանքներ: ՔԿ-ից էլ հայտնել են, որ ոստիկանության ծառայողների նկատմամբ բռնություն գործադրելու հիմնավոր կասկածի հիմքով 1 անձ է ձերբակալվել։ Նա ըստ ոստիկանների, «Շոկ» գրառմամբ արցունքաբեր գազ է կիրառել իրենց նկատմամբ։

Հելսինկյան ասոցիացիայի նախագահ, իրավապաշտպան Նինա Կարապետյանցը անթույլատրելի է համարում բռնությունը՝ լինի ոստիկանության, թե ընդդիմության կողմից։  Ըստ նրա՝ անհասկանալի է՝ ինչ է իրականության մեջ նշանակում հոգևոր ծառայության սառեցումը․

«Միայն ինձ չի, որ անհասկանալի է սա, բազմաթիվ մարդկանց գրառումներ եմ տեսել, ովքեր իրապես չեն հասկանում՝ սա ինչ է նշանակում, հոգևոր ծառայությա՞ն, թե դասի սառեցում է լինում։ Եթե մեկին կարելի է սառեցնել, ինչո՞ւ մյուսին չի կարելի հայեցողական որոշում կայացնել։ Առաջին անգամ ենք լսում, որ հոգևորականը վարչապետի թեկնածու է հռչակվել, այլև սառեցվել են ինչ-որ պրոցեսներ»։

Իրավապաշտպանը այս պրոցեսի տակ հետին միտք է տեսնում՝ այն իմաստով, որ Գարեգին Բ կաթողիկոսը կամ Հայ առաքելական եկեղեցին չեն ուզում ուղիղ փոխկապակցվել հետագա հնարավոր գործողությունների հետ․ «Իր վրայից ուղղակի մի կողմ է դնում պատասխանատվությունը՝ ասելով, թե տվյալ անձը իրենց մոտ չի ծառայում»,- նշում է Նինա Կարապետյանցը։

Հարցազրույցն ամբողջությամբ՝ տեսանյութում։

Ռոբերտ Անանյան