Ադրբեջանում Ֆրանսիայի դեսպանը խոսել է Բերձոր այցի մասին

Ադրբեջանում Ֆրանսիայի դեսպան Անն Բուայոնը Բաքվում հավատարմագրված դիվանագիտական ​​կորպուսի ներկայացուցիչների հետ այցելել է Բերձոր՝ ցանկանալով տեսնել, թե այստեղ վերականգնողական աշխատանքները սկսելուց հետո ինչ հաջողություններ կան։ Ադրբեջանական Report գործակալության հետ զրույցում նա նշել է, որ սա իր առաջին այցն է Բերձոր։

«Այսօր COP29-ին նվիրված միջոցառում է, և ես կարծում եմ, որ սա լավ հնարավորություն է՝ ավելին իմանալու Ադրբեջանի COP29-ի նախագահության առաջնահերթությունների մասին: Սա մեզ թույլ տվեց ավելին իմանալ այս տարածաշրջանի վերականգնման մասին՝ վերականգնվող էներգիայի, զբոսաշրջության և գյուղատնտեսության ուղղությամբ։ Ես հասկանում եմ, որ սա առանձնահատուկ վայր է, քանի որ Լաչինում չկան ավերակներ, ինչպես Աղդամում և այլ շրջաններում, հետաքրքիր էր տեսնել, թե այստեղ վերականգնողական աշխատանքները սկսելուց հետո ինչ ձեռքբերումներ են գրանցվել»,- ասել է դեսպանը։

Ինչ վերաբերում է COP29-ի շրջանակում համագործակցությանը, Ֆրանսիայի դեսպանն ասել է, որ նման համագործակցություն արդեն կա․ «COP29-ի նախագահը մեկ շաբաթ առաջ Փարիզում էր: COP29-ը համաշխարհային իրադարձություն է, մենք պետք է աջակցենք COP29-ի հաջողությանը՝ աշխարհի և մեր երեխաների ապագայի համար»։

Նշենք, որ այսօր Ադրբեջանում հավատարմարված դիվանագիտական կորպուսի ներկայացուցիչների, այդ թվում՝ ռազմական կցորդների այցն էր կազմակերպվել Բերձոր՝ COP29-ի շրջանակում մասնակցելու «Lachin Climate Action Dialogue»-ին։

Հիշեցնենք՝ ապրիլի կեսերին Ֆրանսիայի ԱԳՆ-ն հայտնել էր, որ որոշել է հետ կանչել Ադրբեջանում իր դեսպանին խորհրդակցությունների համար՝ կապված վերջին ամիսներին Ադրբեջանի կողմից երկու երկրների հարաբերությունները վնասող միակողմանի գործողությունների հետ։ Ավելի ուշ ադրբեջանական լրատվամիջոցները հայտնել էին, որ դեսպանը վերադարձել է Բաքու ու շարունակում է իր դիվանագիտական գործունեությունը։

Էմմա Չոբանյան