21.06.2026 | 10:44
ՀՀ տարածքում ավտոճանապարհներն անցանելի են
Վարորդների գործադուլից հետո «Երևանի ավտոբուս» ՓԲԸ-ի տնօրենի ԺՊ-ն թողել է աշխատասենյակը և հեռացել
Քաղաքականություն
23.05.2024 | 12:15
Factor TV-ի տեղեկություններով «Երևանի ավտոբուս» ՓԲԸ-ի տնօրնեի ժամանակավոր պաշտոնակատար Սամվել Նազարյանը վարորդների երեկվա գործադուլից հետո հավաքել է իրերը և հեռացել աշխատասենյակից։ Երևանի քաղաքապետարանի լրատվության վարչությունից չհաստատեցին աշխատանքից ազատման տեղեկությունը՝ նշելով, որ «Երևանի ավտոբուս» ՓԲԸ-ի տնօրենի ժամանակավոր պաշտոնակատարին ազատելու հիմք չկա։ Այդուհանդերձ, վարորդները անանուն մնալու պայմանով Factor TV-ի հետ զրույցում ևս պնդեցին, որ Նազարյանը գիշերն ազատվել է պաշտոնից։ Հիշեցնենք, որ նա վերջերս էր նշանակվել այդ պաշտոնին՝ փոխարինելով Հովհաննես Մանուկյանին։
Հասարակական տրանսպորտի վարորդները Երևանում երեկ գործադուլ էին անում` դժգոհելով, որ ապրիլի 8-ին «Երևանի ավտոբուս» ՓԲԸ-ի տնօրենի ժամանակավոր պաշտոնակատար նշանակված Սամվել Նազարյանն անհիմն ազատումներ է անում ընկերությունում և երեկ էլ ազատել է գլխավոր ինժեներ Անդրանիկ Մանուկյանին։
Երևանի քաղաքապետի մամուլի խոսնակ Հայկ Կոստանյանը հայտնել էր, որ հասարակական տրանսպորտի որոշ երթուղիների վարորդներ չեն կատարել իրենց աշխատանքային պարտականությունները և ուղեգծերից դուրս են եկել: Երևանի քաղաքապետարանը վարորդների այս նախաձեռնությունը դիտարկել էր որպես սաբոտաժային քայլ՝ ընդդեմ տրանսպորտի ոլորտում իրականացվող բարեփոխումների:
Այնինչ վարորդներն պնդում էին, որ «Երևանի ավտոբուս» ՓԲԸ–ի տնօրենի ժամանակավոր պաշտոնակատար նշանակված Սամվել Նազարյանը հին աշխատողներին անհիմն հեռացնում է և աշխատանքի տեղավորում իր մտերիմներին։
Անի Թամրազյան
