30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Չինաստանը զորավարժություններ է սկսել Թայվանի մոտ
Քաղաքականություն
23.05.2024 | 14:10
Թայվանի նոր նախագահ Լայ Ցինդեի պաշտոնավարման մեկնարկից ընդամենը մի քանի օր անց Չինաստանը զորավարժություններ է սկսել կղզու մոտ, որը նա համարում է անջատված նահանգ: Այս մասին հայտնել է Չինաստանի Ժողովրդական-ազատագրական բանակի արևելյան հրամանատարությունը։
ՉԺՀ-ի իշխանությունները մշտապես հայտարարում են, որ Թայվան կղզին «Չինաստանի տարածքի անբաժանելի մասն է, իսկ Թայվանի գործերը Չինաստանի ներքին գործերն են», գրում է DW-ի ռուսական ծառայությունը։
Նշվում է, որ զորավարժություններին, որոնք սկսվել են մայիսի 23-ի առավոտյան, մասնակցում են Չինաստանի ցամաքային, ռազմածովային, օդային և հրթիռային ուժերը։ Զորավարժությունները կանցկացվեն Թայվանի նեղուցում, Թայվանի ափերի հյուսիսում, հարավում և արևելքում, ինչպես նաև Թայվանի կողմից վերահսկվող Կինմեն, Մազու, Ուկիու և Դոնգին կղզիների շրջակայքում, դրանք կտևեն մինչև մայիսի 24-ի երեկո:
«Սա նաև խիստ պատիժ է Թայվանի անկախության կողմնակիցների անջատողական գործողությունների համար և խիստ նախազգուշացում արտաքին ուժերի միջամտության և սադրանքների դեմ»,- ասվում է Չինաստանի բանակի Արևելյան հրամանատարության պաշտոնական ներկայացուցչի հայտարարությունում:
Զորավարժությունները «կենտրոնանալու են ռազմածովային և ռազմաօդային ուժերի մարտական պատրաստության համատեղ փորձարկման և հիմնական թիրախների դեմ հարվածներ իրականացնելու վրա»։
