09.09.2026 | 21:35
Մեկնարկել է Փաշինյանի և Մակրոնի հանդիպումը
ՌԴ ԳՇ պետի տեղակալը ձերբակալվել է
Քաղաքականություն
23.05.2024 | 12:10
ՌԴ Քննչական կոմիտեն ձերբակալել է երկրի Զինված ուժերի կապի գլխավոր վարչության ղեկավար, Գլխավոր շտաբի պետի տեղակալ, գեներալ-լեյտենանտ Վադիմ Շամարինին։ Այս մասին հայտնում է «Կոմերսանտ»-ը՝ վկայակոչելով իրավապահ մարմիններում իր աղբյուրին, փոխանցում է Meduza-ն։
«Կոմերսանտ»-ի տվյալներով՝ Շամարինին ձերբակալել են ենթադրյալ խարդախության դեպքի առթիվ հարուցված քրեական գործով։ Գեներալի մոտ խուզարկություն է իրականացվել, ապա նա տարվել է Քննչական կոմիտեի զինվորական քննչական գլխավոր վարչություն՝ հարցաքննության։ Գործը քննվում է թիվ 235 կայազորային զինվորական դատարանում։
Քննչական կոմիտեն այս տեղեկությունը դեռևս չի մեկնաբանել։
Վերջին շրջանում հայտնի է դարձել մի շարք քրեական գործերի մասին, որոնք հարուցվել են ՌԴ ՊՆ բարձրաստիճան պաշտոնյաների նկատմամբ։ Շամարինը 4-րդ ռուս բարձրաստիճան զինվորականն է, որը ներգրավվել է քրեական գործի շրջանակում։
Ավելի վաղ առանձնապես խոշոր չափերով կաշառք ստանալու մեղադրանքով ձերբակալվել և կալանավորվել էին պաշտպանության փոխնախարար Տիմուր Իվանովն ու ՊՆ կադրերի գլխավոր վարչության պետ, գեներալ-լեյտենանտ Յուրի Կուզնեցովը։ Մայիսի 17-ին խարդախության գործով կալանավորվել է Հարավային ռազմական օկրուգի 58-րդ բանակի նախկին հրամանատար Իվան Պոպովը։
