Թուրքական ԱԹՍ-ն չի հայտնաբերել Ռաիսիի կործանված ուղղաթիռը․ Իրանի ԳՇ

Իրանը հայտարարել է, որ թուրքական անօդաչու թռչող սարքը, որն օգնել է իրանական թիմերին նախագահ Էբրահիմ Ռաիսիի կործանված ուղղաթիռի լայնածավալ որոնողական աշխատանքների ժամանակ, չի կարողացել նկատել դրա գտնվելու վայրը՝ չնայած այն տեղեկություններին, որ թուրքական ԱԹՍ-ն է առաջինը հայտնաբերել բեկորները, գրում է IRNA գործակալությունը։

Իրանի Զինված ուժերի գլխավոր շտաբը հայտարարություն է տարածել, որ թուրքական անօդաչուն չի կարողացել որոշել ուղղաթիռի ճշգրիտ վայրը: Հայտարարության մեջ ասվում է, որ Իրանի իշխանություններն ընդունել են Թուրքիայի առաջարկը՝ աջակցելու որոնողական գործողություններին այն բանից հետո, երբ իմացել են, որ իրանական անօդաչու թռչող սարքերը, որոնք հագեցած են SAR ռադարով, որոնք կարող են հայտնաբերել օբյեկտներ ամպերի վրա, գտնվում են Հնդկական օվկիանոսի հյուսիսում՝ որպես հիմնական առաքելության մաս:

Նշվում է, սակայն, որ գիշերային տեսողության և ջերմային պատկերման սարքերով հագեցած թուրքական անօդաչու սարքը չի կարողացել հայտնաբերել ուղղաթիռը և վերադարձել է Թուրքիա։

Իրանի գլխավոր շտաբը հայտնել է, որ ուղերձներ է հղել այլ երկրներին, այդ թվում՝ «Ռուսաստանին, Չինաստանին և եղբայրական Թուրքիային»՝ շնորհակալություն հայտնելով ուղղաթիռի վթարի ժամանակ և դրանից հետո նրանց ջանքերի, համագործակցության և կարեկցանքի համար:

Հավելենք, որ Թուրքիան իրանական կողմի խնդրանքով 32 հոգանոց լեռնագնաց փրկարարների խումբ էր ուղարկել Իրան՝ օգնելու որոնել նախագահ Էբրահիմ Ռաիսիի ուղղաթիռը, որը, ըստ նախապես հայտարարվածի, կոշտ վայրէջք է կատարել երկրի հյուսիս-արևմուտքում։

Բացի այդ, Թուրքիան ՊՆ-ն ուղարկել էր տեղական արտադրության Akıncı ԱԹՍ և Cougar ուղղաթիռ՝ գիշերային տեսանելիության հնարավորություններով, մասնակցելու որոնողական աշխատանքներին։ Թուրքական լրատվամիջոցների հայտնել էին, թե Akıncı անօդաչուն է հայտնաբերել ջերմության աղբյուրը, որտեղ էլ, ենթադրաբար, եղել են Իրանի նախագահին ու այլ պաշտոնյաներին տեղափոխող ուղղաթիռի բեկորները, և որ դրանից հետո ԱԹՍ-ն կոորդինատները փոխանցել է Իրանի իշխանություններին:

Էմմա Չոբանյան