ՌԴ-ն սրացումների կարող է գնալ ՀՀ-ում, բայց իշխանափոխության թվաքանակ չկա, Փաշինյանը շարժման դեմ քայլերի չի գնա․ Լիլիթ Դալլաքյան․ ՏԵՍԱՆՅՈՒԹ

Ադրբեջանի հետ սահմանազատման պրոցեսն արդեն Կիրանցում է արվում, որտեղ 3 սյուն է տեղադրված, կան սահմանապահներ։ Սահմանազատման աշխատանքներն արդեն մոտենում են ավարտին։ Սահմանազատված հատվածում սահմանը վերահսկողության տակ են վերցնում հայկական սահմանապահ ուժերը: Գործընթացն իրականացնելու համար ժամանակավորապես փակվում է Կիրանցի մուտքը։

«Ներկայում ընթանում է Հայաստանի և Ադրբեջանի միջև սահմանների որոշման գործընթացը, և տեսնում ենք այս գործընթացի առաջին դրական արդյունքները»,- ասել է Ադրբեջանի նախագահը՝ նախօրեին իրանցի պաշտոնակցի հետ համատեղ հայտարարությունների ժամանակ։

Ալիևն ընդգծել է, որ սա հույս է ներշնչում, որ երկար ընդմիջումից հետո «Ադրբեջանի և Հայաստանի միջև կարող է խաղաղության պայմանագիր ստորագրվել»։

«Մենք ողջունում ենք Իրանի աջակցությունն այս հարցում»,- ասել էր նա։

Քաղաքագետ Լիլիթ Դալլաքյանը Factor TV-ի հետ զրույցում ասում է, որ անհրաժեշտ է զերծ մնալ կեղծ հայրենասիրական «ոչ մի թիզ հող» լոզունգներից և խոսել հստակ քարտեզներով լուծումներից։

«Պիտի հասկանանք, թե որն է բարդությունը այս պրոցեսի։ ԱԳ նախարար Արարատ Միրզոյանը, երբ սկսվել էր սահմանազատումը, Ալ-Ջազիրային տված հարցազրույցում նշեց, որ Ադրբեջանը չի ցանկանում Ալմա-Աթայի հռչակագիրը ներառել խաղաղության պայմանագրում։ Ռիսկն այն է՝ արդյո՞ք Ադրբեջանը խաղաղության պայմանագրում կնշի Ալմա-Աթան և արդյո՞ք սահմանի ամբողջ երկայնքով կիրականացվի սահմանազատումը։ Երկրորդ՝ Ադրբեջանն արդյո՞ք կգնա խաղաղության պայմանագրի վավերացման խորհրդարանում, և արդյո՞ք իրենց ստանալիքը վերցնելուց հետո չեն ձգձգի գործընթացը, որպեսզի Հայաստանի տարածքները չվերադարձնեն։ Արդյո՞ք կան երաշխավորներ, որ Ադրբեջանը կպահի իր ստորագրած փաստաթուղթը։ Սրանք հարցեր են, որոնք պատասխանների կարիք ունեն։ Այն ուժերը, որոնք սահմանազատման հարցի հետ կապված բողոքներով են զբաղված, այս հարցերը չեն բարձրացնում։ Ընդամենը խոսում են, որ մեր հողերը տալիս եք, պետք չի զիջումների գնալ և այլն»,- նշեց նա։

Հայաստանում ընդդիմությունը բողոքի ակցիաներ է իրականացնում։ Երբ Բագրատ արքեպիսկոպոս Գալստանյանը մայիսի 9-ին Հանրապետության հրապարակի հանրահավաքում Փաշինյանի հրաժարականն էր պահանջում, նաև ասել էր, որ 7-ից 10 օրում կհեռացնի Փաշինյանին։ Այսօր արդեն 11-րդ օրն է, բայց նա չի ասել՝ ինչո՞ւ իր նշած ժամկետում Փաշինյանը չհեռացվեց, և երկրորդ՝ ինքը մնալո՞ւ է շարժման մեջ՝ իր նշած ժամկետի լրանալուց հետո։

Լիլիթ Դալլաքյանը պնդում է, որ Բագրատ արքեպիսկոպոս Գալստանյանը պարզապես խաբվել է մայիսի 9-ի հանրահավաքի մարդաշատությանը՝ կարծելով, թե կկարողանա 7-ից 10 օրում իշխանափոխություն իրականացնել։ Ըստ քաղաքագետի՝ ՌԴ-ն սրացումների կարող է գնալ ՀՀ-ում, բայց իշխանափոխության թվաքանակ չկա, Փաշինյանը շարժման դեմ քայլերի չի գնա։

Հարցազրույցն ամբողջությամբ՝ տեսանյութում։

Ռոբերտ Անանյան