11.08.2026 | 20:19
Միայն 4 օրում պարեկները վարորդների կողմից բեռների փոխադրման կանոնների խախտման 90 դեպք են արձանագրել
Այս դժվարին ժամանակում կկանգնենք մեր հարևան Իրանի կողքին․ Էրդողան
Քաղաքականություն
20.05.2024 | 15:21
Թուրքիայի նախագահ Ռեջեփ Թայիփ Էրդողանը ցավակցություն է հայտնել Իրանի նախագահ Էբրահիմ Ռաիսիի և ուղղաթիռի կործանման հետևանքով իրանցի այլ բարձրաստիճան պաշտոնյաների մահվան կապակցությամբ։
«Աղոթում եմ, որ ամենակարող Աստված ողորմի իմ սիրելի գործընկերոջը, եղբորը, Իրանի Իսլամական Հանրապետության նախագահ Էբրահիմ Ռաիսիին, որը, ցավոք մահացել է ուղղաթիռի վթարի հետևանքով։ Մաղթում եմ Աստծո ողորմությունը Իրանի արտգործնախարարին և մյուսներին, որոնք իրենց կյանքը կորցրին նույն ուղղաթիռում»,- գրել է Էրդողանը X-ում։
«Որպես գործընկեր՝ իր պաշտոնավարման ընթացքում ականատեսն եմ եղել Իրանի ժողովրդին և մեր տարածաշրջանին խաղաղություն բերելու նրա ջանքերին, հարգանքով և երախտագիտությամբ եմ հիշում պարոն նախագահին: Որպես Թուրքիա՝ մենք այս դժվարին ու տխուր ժամանակներում կկանգնենք մեր հարևան Իրանի կողքին, ինչպես բազմիցս արել ենք»,- նշել է Թուրքիայի նախագահը։
Հավելենք, որ Թուրքիան իրանական կողմի խնդրանքով, 32 լեռնագնաց փրկարարների խումբ էր ուղարկել Իրան՝ օգնելու որոնել նախագահ Էբրահիմ Ռաիսիի ուղղաթիռը, որը կոշտ վայրէջք էր կատարել երկրի հյուսիս-արևմուտքում։ Բացի այդ՝ Թուրքիան ՊՆ-ն ուղարկել էր տեղական արտադրության Akıncı ԱԹՍ և Cougar ուղղաթիռ՝ գիշերային տեսանելիության հնարավորություններով, մասնակցելու որոնողական աշխատանքներին։
Թուրքական լրատվամիջոցների հաղորդմամբ՝ Akıncı անօդաչուն հայտնաբերել է ջերմության աղբյուրը, որտեղ էլ, ենթադրաբար, եղել են Իրանի նախագահին ու այլ պաշտոնյաներին տեղափոխած ուղղաթիռի բեկորները։ Այնուհետև ԱԹՍ-ն կոորդինատները փոխանցել է Իրանի իշխանություններին:
