Ալիևը թակարդն ընկավ՝ խոստովանելով, որ ՀՀ-ից զավթել է տարածքներ․ պիտի լքի գրաված բարձունքները․ Էմիլ Օրդուխանյան․ ՏԵՍԱՆՅՈՒԹ

ՀՀ ԱԽ քարտուղար Արմեն Գրիգորյանը երեկ հայտարարեց, որ սահմանազատումը հաջող է անցել, և «Հայաստանի տարածքից որևէ միլիմետր հող չի հանձնվել»։ Բայց ամեն դեպքում՝ ՀՀ իշխանությանը հարցեր կան, օրինակ՝ Ադրբեջանը 1976 թվականի քարտեզի հիման վրա կշարունակի՞ սահմանազատումը Սյունիքի և Գեղարքունիքի մարզերում, այսինքն՝ ՀՀ-ին կվերադարձնի՞ զավթած շուրջ 300 ք/կմ տարածքները։

ԱԺ ընդդիմությունը պնդում է, թե Հայաստանի և Ադրբեջանի սահմանազատման հանձնաժողովների ստորագրած արձանագրությունը և դրանից բխող ցանկացած գործողություն ապօրինի է, քրեորեն պատժելի և դա նաև միակողմանի զիջում է, նաև նշում են՝ ապօրինի է Ալմա- Աթայի հռչակագրով առաջնորդվելը։

Ի պատասխան այս քննադատությունների՝ Գրիգորյանը ասաց, որ ՀՀ տարածքից որևէ բան չի զիջվել, ՀՀ տարածքն անցնում է այնտեղով, որտեղով անցնում է 1976 թվականի քարտեզում նշված սահմանը։

Քաղաքագետ Էմիլ Օրդուխանյանը թերահավատների գնահատականներում մանիպուլյացիա է տեսնում։ «Ոչ ոք չի կարող հստակ ասել՝ ադրբեջանցիները երբ են հետ քաշվելու, բայց հստակ է հետևյալը, որ Անվտանգության խորհրդի քարտուղարն ասաց, որ ՀՀ տարածքից մեկ սանտիմետր չի զիջվել, ինչը նշանակում է՝ մենք հստակ գիտենք, թե որն է ՀՀ տարածքը։ Սա կոնստանտ է, որի մեջ մտնում են նաև այն հատվածները, ուր Ադրբեջանը ներխուժել է։ Սա ենթադրել է տալիս, որ սահմանազատման արդյունքում, որքան էլ այն տևի, ՀՀ-ն պահանջատեր է լինելու, որ վերականգնվի իր վերահսկողությունը հայկական սուվերեն տարածքի նկատմամբ։ Դա նշանակում է, որ Ադրբեջանը պետք է դուրս գա ՀՀ-ին պատկանող տարածքներից»,- ասաց քաղաքագետը։

Էմիլ Օրդուխանյանը, հիշեցնելով հունվարին Իլհամ Ալիևի այն խոստովանությունը, որ վերահսկողության տակ է առել ՀՀ-ի սահմանակից բարձունքներ, նշեց, որ այդպիսով՝ Ադրբեջանն ընդունեց, որ զավթել է Հայաստանի տարածքներ։ Դա նշանակում է, որ Ադրբեջանը սահմանազատման այս պրոցեսի արդյունքում պետք է դուրս գա ՀՀ-ից զավթած տարածքներից։

Հարցազրույցն ամբողջությամբ՝ տեսանյությում։

Ռոբերտ Անանյան