12.01.2025 | 00:54
Կիևյան փողոցի տներից մեկում հրդեհ է բռնկվել. դեպքի վայր է մեկնել չորս մարտական հաշվարկ
Ադրբեջանի ԱԳՆ-ն ներողություն է պահանջում Ֆրանսիայից
Քաղաքականություն
17.05.2024 | 14:12
Ադրբեջանի ԱԳՆ խոսնակ Այխան Հաջիզադեն կրկին արձագանքել է Ֆրանսիայի ներքին գործերի նախարար Ժերալդ Դարմանենի հայտարարություններին, որը France-2 հեռուստաալիքի հետ զրույցում Անդրբեջանն անվանել էր բռնապետություն։
Նա ասել է, թե Ֆրանսիայի կողմից Ադրբեջանի հասցեին հնչեցված նման կարծիքները միանգամայն անընդունելի են և կտրականապես մերժվում են պաշտոնական Բաքվի կողմից։
«Ի տարբերություն Ֆրանսիայի, որտեղ մարդու իրավունքները կոպտորեն խախտվում են, ցուցարարները սպանվում են անկարգությունների ժամանակ, տարածված են իսլամատյացության դեպքերը և մահմեդականների դեմ հարձակումները, ինչպես նաև հակասեմականությունը, Ադրբեջանում հիմնարար իրավունքներն ու ազատությունները լիովին երաշխավորված են։ Իր անկախությունը վերականգնելուց ի վեր Ադրբեջանը միշտ ձևավորվել և զարգացել է որպես ժողովրդավարական արժեքներին հավատարիմ հասարակություն։ Ադրբեջանը երկիր է, որտեղ տարբեր էթնիկ և կրոնական պատկանելության մարդիկ ապրում են բարեկամական և անվտանգ պայմաններում»,- հայտարարել է Հաջիզադեն։
Նա նաև Ֆրանսիայից ներողություն է պահանջել։
«Ֆրանսիական կողմը պետք է ներողություն խնդրի այս հայտարարության համար, հակառակ դեպքում, դա ավելի բացասական ազդեցություն կունենա Ադրբեջան-Ֆրանսիա հարաբերությունների վրա»,- նշել է նա:
Հիշեցնենք, որ Ֆրանսիայի ներքին գործերի նախարարը հայտարարել էր Նոր Կալեդոնիայում անկարգություններին Բաքվի մասնակցության մասին։
«Դա ֆանտազիա չէ, դա իրականություն է։ Ես ցավում եմ, որ Կալեդոնիայի անկախության որոշ առաջնորդներ գործարքի են գնացել Ադրբեջանի հետ, դա անվիճելի է»,- ասել էր նախարարը։
Հակաֆրանսիական արշավի շրջանակում 2023 թվականի հուլիսի 6-ին ստեղծվել է Բաքվի նախաձեռնող խումբ, որը Փարիզի դեմ տարբեր միջոցառումներ է իրականացնում։ Բաքուն սկսել է ակտիվորեն ֆինանսավորել Ֆրանսիայի և Կորսիկայի անդրծովյան տարածքների որոշ ներկայացուցիչների։ Ապրիլին էլ Ադրբեջանի Միլլի Մեջլիսի և Խաղաղ օվկիանոսում գտնվող ֆրանսիական Նոր Կալեդոնիայի Կոնգրեսի միջև ստորագրվել էր համագործակցության հուշագիր։
Ի դեպ, նախօրեին Բաքվի նախաձեռնող խումբը կազմակերպել է «Համերաշխություն կանակի ժողովրդի հետ» տեսակոնֆերանս, որի ընթացքում Ադրբեջանի կողմից ֆինանսավորվող Նոր Կալեդոնիայի պաշտոնյաները մանրամասներ են ներկայացրել, իբր, «վերջին օրերին ֆրանսիական ոստիկանության և ժանդարմերիայի ուժերի կողմից կատարված վայրագությունների մասին»։
Էմմա Չոբանյան
