Ինչ է հայտարարագրել ԱԺ պատգամավոր Տիգրան Աբրահամյանը

ԱԺ «Պատիվ ունեմ» խմբակցության քարտուղար, ՀՀԿ գործադիր մարմնի անդամ Տիգրան Աբրահամյանն անցած տարի թարմացրել է իր շարժական գույքը։ Ըստ Կոռուպցիայի կանխարգելման հանձնաժողով պատգամավորի ներկայացրած 2023 թ-ի գույքի և եկամուտների հայտարարագրի՝ Աբրահամյանը 4․2 մլն դրամով վաճառել է 2008 թ-ի արտադրության TOYOTA մակնիշի ավտոմեքենան և «Մխիթարյան ֆեմիլի» ՍՊԸ-ից մոտ 3․5 մլն դրամով գնել է 2018 թ-ի արտադրության NISSAN մակնիշի ավտոմեքենա։

Պատգամավորը հայտարարագրել է Երևանում 2017-ին գնված 1 համատեղ բնակարան։ Տարեվերջին բանկում ունեցել է 6․2 մլն դրամ ավանդ, բանկային 2 հաշիվներին՝ 4․1 մլն դրամ, իսկ կանխիկ՝ 650 հազար դրամ։

Աբրահամյանը 2023-ին 10․2 մլն դրամ եկամուտ է ստացել, այդ թվում՝ 334 հազար դրամ «Այ դի բանկից» տոկոսավճար, 668 հազար դրամ՝ ՊԵԿ-ից հիփոթեքի եկամտահարկի վերադարձ, մոտ 8․8 մլն դրամ աշխատավարձ Ազգային ժողովից և 413 հազար դրամ աշխատավարձ Ռուս-հայկական (Սլավոնական) համալսարանից։

Նրա վարկի մայր գումարի մնացորդը տարեվերջին կազմել է 6․7 մլն դրամ։

Պատգամավորն անցած տարի 2 մլն 57 հազար դրամ միանվագ ծախս է արել։

Աբրահամյանի կինը՝ Գոհար Քոչարյանը, որ աշխատում է Վահե և Վիգեն Բադալյաններին պատկանող Softconstruct ընկերությունում որպես տեխնիկական հրապարակումների մասնագետ, բացի համատեղ բնակարանից ունի նաև 4 հողամաս Լոռու Բովաձոր համայնքում։

Softconstruct-ից Քոչարյանը ստացել է 6․2 մլն դրամ աշխատավարձ, ևս 567 դրամ «Այ Դի բանկից»՝ որպես տոկոսավճար։ Նրա բանկային հաշվին տարեվերջի դրությամբ եղել է 2684 դրամ, իսկ կանխիկ հայտարարագրել է մոտ 1․5 մլն դրամ։

Գայանե Խաչատրյան