23.02.2026 | 10:45
Այս շաբաթ բոլոր փողոցները ավազի մնացորդներից մաքրված կլինեն․ Ավինյան․ ՏԵՍԱՆՅՈՒԹ
Բաքուն արձագանքել է Նոր Կալեդոնիայում անկարգություններին միջամտելու մասին Փարիզի հայտարարությանը
Քաղաքականություն
16.05.2024 | 17:41
Բաքուն կտրականապես հերքում է 2024 թվականի մայիսի 16-ին France-2 հեռուստաալիքին տված հարցազրույցում Ֆրանսիայի ներքին գործերի նախարար Ժերալդ Դարմանենի հայտարարություններն Ադրբեջանի հասցեին, ինչպես նաև Ադրբեջանի ու Նոր Կալեդոնիայի ղեկավարների հարաբերությունների վերաբերյալ։ Այս մասին ասվում է Ադրբեջանի ԱԳՆ խոսնակ Այխան Հաջիզադեի հայտարարության մեջ։
«Առաջին հերթին՝ մենք ևս մեկ անգամ խստորեն դատապարտում ենք ֆրանսիական կողմի վիրավորական հայտարարություններն Ադրբեջանի հասցեին և պահանջում դադարեցնել զրպարտչական արշավը այնպիսի անընդունելի մեղադրանքներով, ինչպիսին է հայերի զանգվածային սպանությունների իրականացումը, որը Ֆրանսիան ներկայացնում է Ադրբեջանին»,- ասել է Հաջիզադեն։
Նա կրկին Փարիզին մեղադրել է «գաղութատիրական քաղաքականության և բնիկ ժողովուրդների սպանության մեջ»։
«Նոր Կալեդոնիայում անկախության կողմնակիցների ցույցերին աջակցելու համար Ադրբեջանին մեղադրելու փոխարեն՝ Ֆրանսիայի ներքին գործերի նախարարը պետք է կենտրոնանա իր երկրի ձախողված քաղաքականության վրա, որը հանգեցնում է նման բողոքի ակցիաների: Մենք ևս մեկ անգամ կոչ ենք անում Ֆրանսիային դադարեցնել անհիմն մեղադրանքները մեր երկրի հասցեին»,- հայտարարել է Հաջիզադեն։
Նշենք, որ Ֆրանսիայի ԱԳ նախարարը հայտարարել էր Նոր Կալեդոնիայում անկարգություններին Բաքվի մասնակցության մասին։
«Դա ֆանտազիա չէ, դա իրականություն է։ Ես ցավում եմ, որ Կալեդոնիայի անկախության որոշ առաջնորդներ գործարքի են գնացել Ադրբեջանի հետ, դա անվիճելի է»,- ասել էր նախարարը։
Հակաֆրանսիական արշավի շրջանակում 2023 թվականի հուլիսի 6-ին ստեղծվել է Բաքվի նախաձեռնող խումբ, որը Փարիզի դեմ տարբեր միջոցառումներ է իրականացնում։ Բաքուն սկսել է ակտիվորեն ֆինանսավորել Ֆրանսիայի և Կորսիկայի անդրծովյան տարածքների որոշ ներկայացուցիչների։ Ապրիլին էլ Ադրբեջանի Միլլի Մեջլիսի և Խաղաղ օվկիանոսում գտնվող ֆրանսիական Նոր Կալեդոնիայի Կոնգրեսի միջև ստորագրվել էր համագործակցության հուշագիր։ Ի դեպ, Նոր Կալեդոնիայում անկարգությունների ֆոնին համացանցում ադրբեջանական բոտ-օգտահաշիվները ֆրանսիական ոստիկանությանը վարկաբեկող գրառումներ են տարածում։
Էմմա Չոբանյան
