Պայթյուններ բռնակցված Ղրիմում, հրդեհ է բռնկվել Բելբեկի օդանավակայանում․ ՏԵՍԱՆՅՈՒԹ

Բռնակցված Ղրիմում մայիսի 15-ի երեկոյան կրկին պայթյուններ են որոտացել, հաղորդում են տեղական Telegram ալիքները, հրդեհ է բռնկվել Բելբեկի օդանավակայանում։ Ռուսաստանի պաշտպանության նախարարությունը պնդում է, որ թերակղզում հինգ ATACMS հրթիռ է խոցվել, փոխանցում է Current Time-ը։
Մայիսի 15-ի ուշ երեկոյան բռնակցված Սևաստոպոլում ավիահարվածի մասին ահազանգ է հայտարարվել։ ՌԴ ռազմական գերատեսչության տվյալներով՝ հակաօդային պաշտպանության համակարգերը ATACMS օպերատիվ-մարտավարական հինգ հրթիռ են խոցել։ Դա տեղի է ունեցել Մոսկվայի ժամանակով 23։00-ի սահմաններում։
Ռուսաստանի իշխանությունների կողմից նշանակված Սևաստոպոլի «նահանգապետ» Միխայիլ Ռազվոժաևը հայտնել է, որ հյուսիսային կողմում վնասվել է երկու առանձնատուն և մեկ մեքենա, մեկ այլ տանը՝ վեց պատուհան։ Նրա խոսքով՝ զոհեր և վիրավորներ չկան։
Պայթյունների մասին հայտնել են Սևաստոպոլի, Սիմֆերոպոլի, Ջանկոյի և Գվարդեյսկոյեի բնակիչները, գրում է «Крым.Реалии-ն»։
Astra-ն էլ, հղում անելով բաժանորդներին, հայտնել է, որ մայիսի 15-ի երեկոյան հրդեհ է բռնկվել Սևաստոպոլի հյուսիս-արեւմուտքում գտնվող Բելբեկի օդանավակայանում։

Ուկրաինական «Կրիմսկիյ վետերը», հղում անելով իր աղբյուրներին, պնդում է, որ Բելբեկի օդանավակայանի վրա հարձակման հետևանքով վառելիքի պահեստ է բռնկվել։

Ուկրաինացիների և Ղրիմի թաթարների «Աթեշ» շարժումն իր հերթին հայտարարել է, որ հարվածներ են գրանցվել Ղրիմի մի քանի ռազմական օբյեկտների վրա։