Բլինքենը հայտարարել է Ուկրաինային ևս 2 մլրդ դոլարի ամերիկյան օգնության հատկացման մասին

ԱՄՆ պետքարտուղար Էնթոնի Բլինքենը հայտարարել է Ուկրաինային ևս 2 միլիարդ դոլարի ռազմական օգնության հատկացման մասին, քանի որ ուկրաինական զորքերը փորձում են զսպել Ռուսաստանի հարձակումը Խարկովի մարզում, գրում է BBC-ի ռուսական ծառայությունը։

Մի քանի շաբաթ առաջ ԱՄՆ Կոնգրեսը հավանություն էր տվել Ուկրաինային ավելի քան 60 միլիարդ դոլար արժողությամբ երկար սպասված օգնության փաթեթին, իսկ Ուկրաինայի ԱԳ նախարար Դմիտրի Կուլեբայի հետ համատեղ մամուլի ասուլիսում Բլինքենն ասել է, որ Վաշինգտոնն ամեն ջանք գործադրում է՝ Կիևին արագ ռազմական տեխնիկա տրամադրելու համար։

«Ամբողջ ուշադրությունը սևեռված է արևելքին ու հյուսիս-արևելքին, մասնավորապես, Խարկովին, այդ պատճառով նոր աջակցությունը, որի մասին հայտնեցի, հատկապես՝ նոր լրացուցիչ ֆինանսավորումը 60 մլրդ դոլարի չափով, գալիս է կրիտիկական պահին։ Մենք շտապ մատակարարում ենք զինամթերք, զրահատեխնիկա, հրթիռներ, հակաօդային պաշտպանության համակարգեր, շտապ հասցնում դրանք առաջնագիծ՝ զինվորներին և խաղաղ բնակիչներին պաշտպանելու համար։ Ինչ վերաբերում է հակաօդային պաշտպանությանը, դա, իհարկե, առաջնահերթություն է, և մեր զրույցներում մենք կանգ ենք առել այն աշխատանքի վրա, որ անում ենք ավելի շատ հակաօդային պաշտպանության միջոցներ գտնելու և դրանք Ուկրաինա հասցնելու ուղղությամբ»,- ասել է Բլինքենը։

Նա նաև նշել է, որ առաջիկա շաբաթներին ԱՄՆ նախագահ Ջո Բայդենը կարող է հանդիպել Ուկրաինայի նախագահ Վլադիմիր Զելենսկիին։