15.12.2025 | 23:44
Ադրբեջանը պետք է դադարեցնի անձանց հսկողության MIRAS համակարգի ներդրումը. HRW
Ալիևի կողմից պարգևատրված ադրբեջանուհին իրեն մեղավոր է ճանաչել ԱՄՆ կոնգրեսականին կաշառելու գործում
Քաղաքականություն
15.05.2024 | 10:50
ԱՄՆ-ում քննիչներն արդեն երրորդ մեղադրանքն են ներկայացրել Թեխաս նահանգից Ներկայացուցիչների պալատի անդամ Հենրի Կուելարի գործի շրջանակում, ըստ որի՝ նա 600,000 դոլար կաշառք է ստացել Ադրբեջանի կողմից վերահսկվող էներգետիկ ընկերությունից և Մեքսիկայում գտնվող բանկից, գրում է AP-ն։
67-ամյա Իրադա Ախունդովան մայիսի 1-ին Հյուսթոնի դաշնային դատարանում իրեն մեղավոր է ճանաչել այն բանում, որ հանդես է եկել որպես Ադրբեջանի գործակալ: Ախունդովան խոստովանել է, որ նպաստել է 60,000 դոլարի վճարմանը Կոնգրեսականի կնոջը՝ Իմելդա Կուելարին, որին նույնպես մեղադրանքներ են առաջադրվել։ Ադրբեջանական շահերի առաջ մղման համար ենթադրյալ կաշառքը կազմել է ավելի քան 300 հազար դոլար։
Ախունդովային սպառնում է մինչև հինգ տարվա ազատազրկում։
Հավելենք, որ մոտ 20 տարի Ախունդովան աշխատել է որպես Հյուսթոն-Բաքու քույր քաղաքների ասոցիացիայի նախագահ, որը շահույթ չհետապնդող կազմակերպություն է։ Դատական հայցում ասվում է, որ նա աշխատել է որպես Բաքվում գործող ընկերության ԱՄՆ մասնաճյուղի տնօրեն 2014-ից 2017 թվականներին:
Մեղադրական եզրակացության համաձայն՝ Ադրբեջանի պաշտոնյաները ցանկացել են ստանալ երկրի աջակցությունը Հայաստանի հետ հակամարտության համատեքստում։ Ի թիվս այլ բաների՝ Կուելարը համաձայնել է ազդել Ադրբեջանին ձեռնտու օրենսդրական նախաձեռնությունների վրա և ադրբեջանամետ ելույթներ ունենալ ԱՄՆ Ներկայացուցիչների պալատում։ Կուելարը ժամանակին Կոնգրեսում եղել է Ադրբեջանի հանձնախմբի համանախագահը։
Ախունդովան երրորդ մարդն է, որն իրեն մեղավոր է ճանաչել Թեխասի կոնգրեսականի նկատմամբ դաշնային հետաքննության շրջանակում: Ժողովուրդների միջև բարեկամության ամրապնդման և ադրբեջանական սփյուռքի զարգացման գործում մատուցած ծառայությունների համար նա 2021 թվականին Ադրբեջանի նախագահ Իլհամ Ալիևի կողմից պարգևատրվել է «Առաջընթաց» մեդալով։
Էմմա Չոբանյան
