Թուրքմենական գազը կհասնի Թուրքիա․ Անկարան և Բաքուն գազային նոր համաձայնագիր են ստորագրել

Թուրքիան ու Ադրբեջանը բնական գազի ոլորտում համագործակցության համաձայնագիր են ստորագրել։ Փաստաթուղթը Ստամբուլում ստորագրել են Ադրբեջանի էկոնոմիկայի նախարար Միխայիլ Ջաբարովն ու Թուրքիայի էներգետիկայի և բնական պաշարների նախարար Ալփարսլան Բայրաքթարը, գրում են ադրբեջանական լրատվամիջոցները։

Ջաբարովը նշել է, որ այս համաձայնագիրը ոչ միայն կապահովի Ադրբեջանի էներգառեսուրսների, առաջին հերթին՝ բնական գազի մատակարարումը Թուրքիա և եվրոպական շուկաներ, այլև կհեշտացնի Կենտրոնական Ասիայից թուրքական շուկա ռեսուրսների մատակարարումը, իսկ ապագայում՝ դեպի համաշխարհային շուկա՝ Ադրբեջանի տարածքով։

Թուրքական ԶԼՄ-ների հաղորդմամբ էլ՝ Ալփարսլան Բայրաքթարը հայտարարել է, որ Թուրքիայի և Ադրբեջանի միջև բնական գազի ոլորտում համագործակցության համաձայնագրով հարաբերությունները նոր հարթություն են ստացել։ Նա նաև նշել է, որ երկու երկրները մինչ օրս համատեղ մշակել են բազմաթիվ նախագծեր։

«Բաքու-Թբիլիսի-Ջեյհան նավթամուղն առաջնահերթ նշանակություն ունի Կասպից և Կովկասյան տարածաշրջանից Թուրքիա և համաշխարհային շուկաներ Թուրքիայի տարածքով նավթի, հատկապես՝ ադրբեջանական նավթի մատակարարման համար։ Այս նոր համաձայնագրում շատ հարցեր կան։ Փաստաթղթի շրջանակում նախատեսում ենք, որ մինչև 2030 թվականն ադրբեջանական բնական գազի հավելյալ ծավալները կհասնեն Թուրքիա, իսկ որոշ ծավալի բնական գազ Եվրոպա կհասնի Թուրքիայի տարածքով։ Կարևոր խնդիրն  այն է, որ այս համաձայնագրի արդյունքում մենք համաձայնության ենք եկել Թուրքմենստանի բնական գազը Ադրբեջանով և Վրաստանի տարածքով Թուրքիա փոխադրելու վերաբերյալ»,- ասել թուրք նախարարը։

Բայրաքթարի տեղեկացմամբ՝ Իգդիր-Նախիջևան գազատարը շահագործման կհանձնվի այս տարի․ «Հուսանք, որ այս ձմռանը Նախիջևանի բնական գազը կմատակարարվի Թուրքիայի տարածքով: Մենք նախատեսում ենք հնարավորինս շուտ շահագործման հանձնել այս գիծը: Մեր շինարարական աշխատանքները ակնհայտորեն մոտենում են ավարտին»:

Հավելենք, որ անցյալ տարվա սեպտեմբերին Նախիջևանի Ինքնավար Հանրապետություն այցի ժամանակ Թուրքիայի նախագահ Ռեջեփ Թայիփ Էրդողանը մասնակցել էր գազատարի հիմնարկեքին։ Factor TV-ին ավելի վաղ ներկայացրել էր, թե ինչ է իրենից ներկայացնում նշյալ գազատարը և ինչ նշանակություն ունի։

Էմմա Չոբանյան