11.01.2025 | 22:52
Վարչապետը առաջնահերթ է համարում խաղաղության գործընթացը, թվայնացումը և կոռուպցիայի դեմ պայքարը. ՏԵՍԱՆՅՈՒԹ
Բայրամովն իր հերթին է հայտարարել՝ Մինսկի խումբը պահպանելու անհրաժեշտություն չկա
Քաղաքականություն
14.05.2024 | 14:15
Ադրբեջանի ԱԳ նախարար Ջեյհուն Բայրամովը Բաքվում ԵԱՀԿ գործող նախագահ, Մալթայի արտաքին գործերի, Եվրոպայի և առևտրի նախարար Իեն Բորջի հետ բանակցություններին հաջորդած մամուլի ասուլիսում հայտարարել է, թե ԵԱՀԿ Մինսկի խումբն իր գործունեության 30 տարիների ընթացքում չի նպաստել ԼՂ հակամարտության կարգավորման լուծմանը:
«Մենք կարծում ենք, որ կարիք չկա պահպանել այս արխայիկ ինստիտուտները, որոնց մանդատները սպառվել են, կորցրել են իրենց ֆունկցիոնալ կարողությունները։ Նաև, հաշվի առնելով ԵԱՀԿ սահմանափակ բյուջեն, կարելի է ասել, որ սրա վրա լրացուցիչ միջոցներ ծախսելու կարիք չկա։ Տվյալ դեպքում այդ կառույցներին հղումները ոչ թե բարելավում են իրավիճակը, այլ հակառակը՝ վնասում»,- ասել է Բայրամովը։
Նա նաև կարծիք է հայտնել, որ Հայաստանի ու Ադրբեջանի միջեւ երկկողմ բանակցությունը դրական ձևաչափ է, և վերջին 6 ամսում այդ ուղղությամբ մեծ աշխատանք է կատարվել։ Որպես դրական զարգացում՝ Բայրամովը նշել է ապրիլին երկու երկրների սահմանի մի հատվածում սահմանազատման գործընթացի մեկնարկը։ Ադրբեջանցի պաշտոնյան նաև նշել է, որ խաղաղության համաձայնագրից ակնկալիքները պետք է իրատեսական լինեն։
«Սա շատ բարդ և անհրաժեշտ գործընթաց է։ Խաղաղության համաձայնագիրն ադրբեջանական կողմի համար պետք է լինի արդար և միջազգային իրավունքի վրա հիմնված համաձայնություն՝ բացառելով ապագայում որևէ վիճելի հարց սեղանի շուրջ դնելու հնարավորությունը։ Մենք նաև հաշվի ենք առնում մյուս կողմի ակնկալիքները և աշխատում ենք փոխադարձ լուծումների ուղղությամբ։ Ալմաթիի բանակցությունները հաջորդ քայլն էին։ Դա մեծ քայլ է, թե՝ փոքր, կիմանանք միայն գործընթացի ավարտին։ Բայց ես կասեմ, որ սա գործընթացի կարևոր մասն է»,- ասել է Բայրամովը։
Հավելենք, որ Բորջի հետ հանդիպմանը ԵԱՀԿ Մինսկի խումբը լուծարելու կոչ էր արել նաև Ադրբեջանի նախագահ Իլհամ Ալիևը։
