Ժամանակն է վերացնել Մինկի խումբն ու դրա հետ կապված ինստիտուտները․ Ալիևը՝ ԵԱՀԿ գործող նախագահին

Ադրբեջանի նախագահ Իլհամ Ալիևը Բաքվում ընդունել է ԵԱՀԿ գործող նախագահ, Մալթայի արտաքին գործերի, Եվրոպայի  և առևտրի նախարար Իեն Բորջի գլխավորած պատվիրակությանը։

Ադրբեջանական կողմի փոխանցմամբ՝ Բորջը գոհունակությամբ է հիշել Մյունխենի անվտանգության համաժողովի շրջանակում Ադրբեջանի նախագահի հետ կայացած հանդիպումն ու քննարկումները։ Նա նշել է, որ Մալթան աջակցում է Ադրբեջանի և Հայաստանի միջև հարաբերությունների կարգավորման ու խաղաղության պայմանագրի բանակցությունների գործընթացին։

Ալիևն իր հերթին նշել է, թե «Բաքուն է նախաձեռնել խաղաղության գործընթացը և հիմնարար սկզբունքները, որոնք այդ գործընթացի հիմք են հանդիսանում, իսկ խաղաղության համաձայնագրի տեքստը պատրաստվել է Ադրբեջանի կողմից և ներկայացվել քննարկման»։ Նա ասել է, որ ներկայում շարունակվում է Ադրբեջանի և Հայաստանի միջև բանակցային գործընթացը՝ խաղաղության օրակարգն առաջ մղելու համար։

Ադրբեջանի նախագահը կրկին դժգոհել է ԵԱՀԿ-ից և Մինսկի խմբի գործունեությունից։ Նա նշել է , թե «ԵԱՀԿ Մինսկի խմբի համանախագահների վարած բանակցային գործընթացը ծառայել է ադրբեջանական տարածքների օկուպացիայի շարունակմանը»։

Ալիևը հերթական անգամ արդարացրել է Արցախի դեմ  իրականացրած ռազմական ագրեսիան ու էթնիկ զտումը՝ հայտարարելով, թե «Ադրբեջանը վերջ է դրել օկուպացիային՝ ապահովելով իր տարածքային ամբողջականությունն ու ինքնիշխանությունը՝ միջազգային իրավունքի նորմերին ու սկզբունքներին և ՄԱԿ-ի կանոնադրությանը համապատասխան»։

«Ասելով, որ հայ-ադրբեջանական հակամարտությունն արդեն մնացել է պատմության մեջ և գոյություն չունի՝ Ադրբեջանի ղեկավարը նշել է, որ ժամանակն է վերացնել ԵԱՀԿ Մինսկի խումբը և դրա հետ կապված բոլոր ինստիտուտները։ Ադրբեջանական կողմը բարձրացրել է այս հարցը, և որևէ պատճառ չկա, որ հայկական կողմը չհամաձայնի դրան»,- ասվում է Ալիևի աշխատակազմի մամուլի ծառայության տարածած հաղորդագրության մեջ։

Հիշեցնենք, որ նախօրեին Իեն Բորջը Հայաստանում էր։ Նա տարբեր պաշտոնյաների հետ բանակցություններ է անցկացրել, այդ թվում՝ ՀՀ վարչապետ Նիկոլ Փաշինյանի և ԱԳ նախարար Արարատ Միրզոյանի։

Էմմա Չոբանյան