14.01.2026 | 22:39
Ինչ իրավիճակ է ճանապարհներին
Կարևոր է պաշտպանել Վրաստանի եվրոպական ապագան․ ԵՄ 12 երկրների ԱԳ նախարարները դիմել են Բորելին ու Վարհեիին
Քաղաքականություն
13.05.2024 | 17:32
ԵՄ անդամ 12 երկրների ԱԳ նախարարները դիմել են Եվրամիության արտաքին գործերի և անվտանգության քաղաքականության հարցերով բարձր ներկայացուցիչ Ժոզեպ Բորելին, ինչպես նաև Հարևանության և ընդլայնման քաղաքականության հարցերով եվրահանձնակատար Օլիվեր Վարհեիին՝ Վրաստանում տեղի ունեցող իրադարձությունների հետ կապված։
Ուղերձում ԱԳ նախարարները քննադատում են Վրաստանի կառավարության վերջին գործողությունները և հայտարարում, որ երկրի եվրոպական ինտեգրացիան սպառնալիքի տակ է, հայտնում է «Ազատություն» ռադիոկայանի վրացական ծառայությունը։
Նախարարները նշում են, որ Վրաստանի իշխանությունները վտանգի տակ են դնում երկրի եվրաինտեգրումը, իսկ այսպես կոչված, «ռուսական օրենքը» Վրաստանում ժողովրդավարական և մարդու իրավունքների հետընթացի տագնապալի հետագծի ևս մեկ նշան է։ Նրանք խնդրում են Բորելին և Վարհեիին՝ անհապաղ բանավոր տեղեկատվություն տրամադրել Եվրահանձնաժողովին այն մասին, թե առաջարկվող օրենքն ինչպես կազդի Թբիլիսիի կողմից 9 քայլերի իրականացման վրա։
«Խնդրում ենք դա անել առաջնահերթության կարգով և ապահովել, որ այս հրապարակային գնահատականը հայտնվի Վրաստանի խորհրդարանում վերջնական քվեարկությունից առաջ։ Ուժի կիրառումը խաղաղ ցուցարարների ու ակցիան լուսաբանող լրագրողների նկատմամբ, հիմնարար իրավունքների ու ազատությունների ճնշումն անհամատեղելի են ժողովրդավարության և եվրոպական արժեքների հետ։ Իր ելույթում «Վրացական երազանքի» պատվավոր նախագահը նաև ամրապնդել է կառավարության հեռացումն արևմտյան ժողովրդավարական սկզբունքներից։ Մենք ձեզ ուղիղ և հստակ ազդանշան ենք ուղարկում, քանի որ կարևոր է պաշտպանել Վրաստանի եվրոպական ապագան»,- ասվում է նամակում։
