08.08.2026 | 13:57
Վթարային ջրանջատում` Երևանի Շենգավիթ վարչական շրջանում
Բաքուն պատրաստվում է Արցախի պետհամալսարանում ուսուցման գործընթաց կազմակերպել
Քաղաքականություն
13.05.2024 | 17:18
Բաքուն պատրաստվում է էթնիկ զտման ենթարկած Ստեփանակերտում գտնվող Արցախի պետական համալսարանում ուսուցման գործընթաց կազմակերպել։ Լրատվամիջոցների հետ զրույցում Ադրբեջանի կրթության և գիտության նախարար Էմին Ամրուլլաևն ասել է, որ հաստատվել է համալսարան ընդունվելու ծրագիրը։
«Հաստատվել է համալսարանի ընդունելության պլանը։ Ղարաբաղի համալսարանում կսովորեն 1200 ուսանողներ։ Այս շաբաթ հանրությանը կներկայացվեն ընտրված 3 ծրագրի ղեկավարները։ Համալսարանում կրթությունը կլինի անվճար, իսկ ուսանողները կապահովվեն հանրակացարանով»,- նշել է նախարարը։
Հավելենք, որ դեռևս 2023 թվականի նոյեմբերի վերջին Ադրբեջանի նախագահ Իլհամ Ալիևը հրամանագիր էր ստորագրել «Ղարաբաղի համալսարան» ստեղծելու մասին։ Ըստ փաստաթղթի՝ Ադրբեջանի Գիտության և կրթության նախարարությանն առընթեր «Ղարաբաղի համալսարանը» ստեղծվելու է Ստեփանակերտում գտնվող բարձրագույն ուսումնական հաստատության հիման վրա։ Նշվում էր, որ կառավարությանը հանձնարարվել է երկամսյա ժամկետում հաստատել համալսարանի կանոնադրությունը և այդ մասին տեղեկացնել նախագահին, ձեռնարկել անհրաժեշտ միջոցները՝ համալսարանի գործունեությունը ֆինանսավորելու, ինչպես նաև ենթակառուցվածքային հարցերը լուծելու համար։
Այս տարի փետրվարին էլ Ալիևը հրամանագիր էր ստորագրել համալսարանի գործունեությունը կազմակերպելու համար ֆինանսական միջոցներ հատկացնելու մասին։ 2024 թվականի պետական բյուջեով նախատեսված պահուստային ֆոնդից դրա համար 10 մլն մանաթ է հատկացվել։
Էմմա Չոբանյան
