Բաքվում ԱՄՆ դեսպանը հանդիպել է տնային կալանքի տակ գտնվող ընդդիմադիր գործչին

Ադրբեջանում ԱՄՆ դեսպան Մարկ Լիբբին հանդիպել է ադրբեջանցի հայտնի տնտեսագետ, ընդդիմադիր Գուբադ Իբադօղլուի հետ, որի խափանման միջոցը վերջերս փոխարինվել է տնային կալանքով։ Այս մասին X-ում գրառմամբ հայտնել է ԱՄՆ դեսպանատունը։

«Դեսպան Լիբբին հանդիպել է դոկտոր Գուբադ Իբադօղլուի հետ, որը տնային կալանքի տակ է։ Միացյալ Նահանգները ողջունում է պարոն Իբադօղլուի խափանման միջոցի փոխոխությունը՝ որպես մարդասիրական ժեստ և շարունակում է շուտափույթ ազատ արձակման կոչ անել»,- ասվում է գրառման մեջ։

Օրերս էլ ԱՄՆ դեսպանը հանդիպել էր իշխանությունների կողմից ձերբակալված քաղհասարակության ներկայացուցիչների ընտանիքների անդամներին։

Նշենք, որ ապրիլի 22-ին Ադրբեջանի իշխանությունները, տեղի տալով միջազգային ճնշումներին, ընդդադիր գործիչ, հայտնի տնտեսագետ Գուբադ Իբադօղլուի բանտարկությունը փոխարինել էին տնային կալանքով։ Գուբադ Իբադօղլուն կալանավորվել է 2023 թվականի հուլիսի 23-ին՝ կեղծ փողեր պատրաստելու (Քրեական օրենսգրքի 204.3.1 հոդված) և կրոնական ծայրահեղական բնույթի նյութեր տարածելու մեղադրանքով (քրեական օրենսգրքի 167-3.1 հոդված)։ Այս մեղադրանքներով նրան սպառնում է մինչև 17 տարվա ազատազրկում։ 2023 թվականի հուլիսի 24-ին Բաքվի Նարիմանովի շրջանային դատարանն ընդդիմադիր գործչի նկատմամբ խափանման միջոց է ընտրել 3 ամիս 26 օր ժամկետով կալանքը։ Փետրվարի 15-ին նրա կալանքը երկարացվել է ևս երեք ամսով։

Իբադօղլուն չի ընդունում առաջադրված մեղադրանքները՝ նշելով, որ իրեն բանտարկել են քաղաքական պատվերով։ Տեղական և միջազգային իրավապաշտպան կազմակերպությունները, ինչպես նաև ԱՄՆ Պետքարտուղարությունն ու մի շարք կոնգրեսականներ Գուբադ Իբադօղլուին համարում են քաղբանտարկյալ։

Իբադօղլուն, բացի քաղաքական գործունեությունից, հայտնի է նաև որպես տնտեսագետ, դասավանդում է արտասահմանյան մի շարք բուհերում։ Սոցցանցերի էջերում նա պարբերաբար սուր քննադատության էր ենթարկում Իլհամ Ալիևին՝ տնտեսության վատ կառավարման, երկրում կոռուպցիայի, մարդու իրավունքների վատթար վիճակի համար։