12.01.2025 | 11:41
Հրդեհ՝ Հյուսիսային պողոտայի սուպերմարկետներից մեկի պահեստային հատվածում
Ուկրաինան կարող է մոբիլիզացնել 10-20 հազար բանտարկյալի․ արդարադատության նախարար
Քաղաքականություն
10.05.2024 | 16:44
Ուկրաինայի արդարադատության նախարար Դենիս Մալյուսկան BBC-ի ուկրաինական ծառայությանը տված հարցազրույցում ասել է, որ երկրի զինված ուժերում կարող է մոբիլիզացվել 10-ից 20 հազար բանտարկյալ։ Այս մասին նա ասել է այն բանից հետո, երբ Գերագույն Ռադան օրենք է ընդունել, որը թույլ է տալիս մոբիլիզացնել որոշ կատեգորիաների դատապարտյալների։
BBC-ի թղթակիցները խնդրել են Մալյուսկային մեկնաբանել այն փաստը, որ նախկինում միայն ռուսական իշխանություններն էին ներգրավված էին բանտարկյալներին ռազմաճակատ մոբիլիզացնելու գործում։
«Ես կույր կլինեի, եթե չտեսնեի զուգահեռները։ Անշուշտ, զուգահեռներ կան։ Կարիք չկա ինքներս մեզ խաբելու, բայց, այնուամենայնիվ, խոսքը մոտեցումների տարբերության մասին է։ Իրենց համար դա հարկադրված մոբիլիզացիա էր, բոլորին ստիպեցին գնալ, նրանց մոտ ոչ մեկին չէին պատրաստում, առանց նախապատրաստության նրանք ուղղակի «միս» էին»,- ասել է ուկրաինացի պաշտոնյան։
Ըստ լրատվամիջոցների՝ Ռուսաստանում բանտարկյալների մոբիլիզացիան կամավոր է եղել։ BBC-ի ռուսական ծառայությունը հաղորդում է, որ ռազմական գործողությունների սկզբնական փուլում նրանց առաջարկել են կռվել վեց ամիս, որից հետո ենթադրվում էր, որ նրանց ներում կշնորհեն և ազատ կարձակեն։ Հետագայում դատապարտյալները սկսել են պայմանագրեր կնքել ՌԴ պաշտպանության նախարարության հետ մինչև ռազմական գործողությունների ավարտը՝ առանց ներման, այլ միայն պայմանական ազատ արձակմամբ։
Ուկրաինայի արդարադատության նախարարը ենթադրություն է հայտնել, որ ուկրաինական բանտերից կարելի է մոբիլիզացնել «տասից քսան հազար» մարդու, «միանշանակ՝ ոչ ավելի»։
