Թուրքիան հերքում է Իսրայելի պնդումները, թե առևտրային արգելքի սահմանափակումները թուլացվել են

Իսրայելի պնդումները, թե Անկարան թեթևացնում է Իսրայելի հետ առևտրի սահմանափակումները, «բացարձակ մտացածին են և իրականության հետ կապ չունեն»։ Այս մասին հայտարարել է Թուրքիայի առևտրի նախարար Օմեր Բոլաթը, գրում են թուրքական լրատվամիջոցները։

«Իսրայելի արտգործնախարարի հայտարարությունները բացարձակ մտացածին են և իրականության հետ կապ չունեն։ Որոշումը մնում է ուժի մեջ։ Իսրայելի հետ առևտուրը դադարեցնելու մեր որոշումն ուժի մեջ կլինի այնքան ժամանակ, քանի դեռ չեն կատարվել Գազայի վրա Իսրայելի հարձակումները դադարեցնելու մեր պայմանները, մշտական ​​հրադադարի ապահովումը և Գազայի մեր պաղեստինցի եղբայրներին մարդասիրական օգնության անխափան առաքումը»,- գրել է Բոլաթը X-ի իր էջում։

Իսրայելի ԱԳ նախարար Իսրայել Կացը գրառմամբ հայտնել էր, որ Թուրքիան առևտրային արգելքի որոշ սահմանափակումներ թուլացրել է։

«Էրդողանը նահանջեց և չեղարկեց առևտրի շատ սահմանափակումներ, և դասը պարզ է։ Մենք չպետք է տրվենք բռնապետի սպառնալիքներին, մենք պետք է այլընտրանքներ ստեղծենք և կախված չլինենք «Մուսուլման եղբայրների» տղայից, որը կարող է ցանկացած պահի այդ ամենը դադարեցնել»,- X-ում գրել էր Կացը։

Ավելի վաղ իսրայելական լրատվամիջոցները հայտնել էին, որ Անկարան որոշ շինանյութեր ներառել է Իսրայել ներմուծման և արտահանման արգելքի բացառությունների ցանկում։ Ըստ տեղեկությունների՝ Թուրքիայի Առևտրի նախարարությունը նամակներ է ուղարկել տեղական որոշ գործարանների, որոնք մինչ արգելքի ուժի մեջ մտնելն աշխատել են Իսրայելի հետ։ Չի նշվում, թե կոնկրետ որ ապրանքների մասին է խոսքը։

Հիշեցնենք՝ Թուրքիայի Առևտրի նախարարությունը մայիսի 2-ին հայտարարել էր, որ Անկարան դադարեցնում է ամբողջ արտահանումն ու ներմուծումը Իսրայել։ Երկրի նախագահ Ռեջեփ Թայիփ Էրդողանն էլ ասել էր, որ ոչ մի ընդունելի բան չկա Իսրայելի և Պաղեստինի միջև տեղի ունեցող զարգացումների մեջ, և որ Իսրայելը մինչ այժմ դաժանորեն սպանել է 40-45,000 պաղեստինցիների:

«Որպես մահմեդականներ՝ մեզ համար անհնար է կանգնել և կողքից հետևել դրան։ Այլևս չէինք կարող համբերել, մենք մեր քայլերն արել ենք։ Մեր միջև առևտրի ծավալը կազմել է 9,5 միլիարդ դոլար։ Մենք փակեցինք այս դուռը»,- հայտարարել  էր Էրդողանը։

Նա նաև նշել էր, որ Թուրքիան կփորձի առևտրային բոյկոտի միջոցով «ստիպել Իսրայելին համաձայնել հրադադարի» և ավելացնել Գազային մարդասիրական օգնությունը:

Էմմա Չոբանյան