29.05.2026 | 23:37
Երևանում կկայանա «Rise» ռազմարդյունաբերական ցուցահանդեսը. կներկայացվեն նախկինում երբևէ չցուցադրված նմուշներ
Իրանն ու Ադրբեջանն առաջիկա օրերին Արաքս գետի վրա ՀԷԿ կբացեն
Քաղաքականություն
07.05.2024 | 23:22
Իրան-Ադրբեջան սահմանին «Գիզ գալասի» հիդրոէլեկտրակայանի շահագործման հանձնման արարողությունը տեղի է ունենալու մոտ օրերս։ Այս մասին հայտնել է Իրանի Արևելյան Ադրբեջան նահանգի տարածաշրջանային ջրային ընկերության գլխավոր տնօրեն Յուսեֆ Գաֆարզադեն, գրում են ադրբեջանական լրատվամիջոցները։
«Ավարտվել են հիդրոէլեկտրակայանի կառուցման աշխատանքները, որը երկրի հյուսիս-արևմուտքում ամենակարևոր նախագիծն է, և այս օբյեկտի հանդիսավոր բացումը տեղի կունենա մոտ օրերս»,- ասել է իրանցի պաշտոնյան։
Նա նշել է, որ հիդրոէլեկտրակայանի շահագործումը կբերի տարածաշրջանի տնտեսական զարգացմանը, գյուղատնտեսական արտադրանքի որակի բարելավմանը և զբոսաշրջության զարգացմանը։
Հիշեցնենք, որ Բաքվում Իրանի դեսպան Սեիդ Աբբաս Մուսավին դեռևս մարտին Baku TV-ին տված հարցազրույցում հայտարարել էր, որ Նովրուզից առաջ երկու երկրների ղեկավարները հանդիպելու են Խոդաֆերինում, որտեղ նրանց ներկայությամբ Իրան-Ադրբեջան սահմանին տեղի կունենա «Խոդաֆերին» և «Գիզ գալասի» հիդրոէլեկտրակայանների բացման արարողությունը։
«Հուսով եմ, որ երկու երկրների էներգետիկայի նախարարները շուտով կհանդիպեն՝ նախապատրաստական աշխատանքներ իրականացնելու համար։ Երկու պետությունների ղեկավարների մասնակցությամբ սահմանին տեղի կունենա «Խոդաֆերին» և «Գիզ գալասի» հիդրոէլեկտրակայանների և համապատասխան ամբարտակների բացման արարողությունը»,- ասել էր դեսպանը։
Նովրուզն ավարտվեց, սակայն նախագահներ Էբրահիմ Ռաիսիի ու Իլամ Ալիևի հանդիպումն այդպես էլ տեղի չունեցավ։ Կողմերը դրա չեղարկման պատճառները չեն հայտնել։
Էմմա Չոբանյան
