14.09.2026 | 23:23
Պապիկյանի գլխավորած պատվիրակությունն աշխատանքային այցով մեկնել է Չինաստան
Պուտինը մայիսի 8-ին առանձնազրույց կունենա Նիկոլ Փաշինյանի հետ
Քաղաքականություն
06.05.2024 | 18:35
ՌԴ նախագահ Վլադիմիր Պուտինը մայիսի 8-ին երկկողմ հանդիպում կանցկացնի ՀՀ վարչապետ Նիկոլ Փաշինյանի հետ, որոնց քննարկման համար կուտակվել են բազմաթիվ հարցեր։ Այս մասին լրագրողներին հայտնել է ՌԴ նախագահի օգնական Յուրի Ուշակովը, գրում է ՏԱՍՍ-ը։
«Բառացիորեն երդմնակալության հաջորդ օրը նախագահն անցկացնում է առաջին խոշոր միջազգային միջոցառումը, այն է՝ Եվրասիական բարձրագույն տնտեսական խորհրդի հոբելյանական հանդիպումը։ Այնուհետև տեղի կունենա երկկողմ հանդիպում Հայաստանի վարչապետ Փաշինյանի հետ, ինչպես նաև ավանդական ընկերական ընթրիք ԱՊՀ երկրների ղեկավարների համար։ Վերջին ժամանակներում Ռուսաստանի և Հայաստանի հարաբերություններում խնդրահարույց հարցեր են կուտակվել, որոնք, ինչպես ակնկալում ենք, բաց կքննարկվեն ղեկավարների միջև։ Գիտեք, որ ինքը՝ Փաշինյանը, ապրիլին հայտարարել է, որ Մոսկվայի հետ հարաբերությունները լավագույն ժամանակները չեն ապրում։ Վերջին շրջանում մեր երկրների միջև տարբեր մակարդակներով շփումները նկատելիորեն նվազել են։ Քննադատություններ են ուղղվում թե՛ Ռուսաստանին, թե՛ ՀԱՊԿ-ին»,- ասել է Ուշակովը։
Խոսելով ՀԱՊԿ-ի խնդիրների մասին՝ Ուշակովն ասել է, որ Երևանը փաստացի սառեցրել է իր մասնակցությունը, թեպետ դեռ դուրս չի եկել, միևնույն ժամանակ, չի մասնակցում կառույցի համատեղ զորավարժություններին և պատրաստվում է ձեռնպահ մնալ դրա ֆինանսավորումից։
«Զուգահեռաբար, Հայաստանը ցուցադրաբար երկխոսություն է զարգացնում Արևմուտքի հետ, ներառյալ՝ Եվրամիությանն անդամակցելու տարբերակների դիտարկումը, և ՆԱՏՕ-ի հետ կապերն ակտիվանում են, այսինքն՝ այժմ կուտակվել են բազմաթիվ հարցեր, որոնք պահանջում են քննարկում առաջնորդների միջև»,- ասել է Կրեմլը ներկայացուցիչը։
Նա նշել է, որ Պուտինը և Փաշինյանը բավական երկար ժամանակ չեն տեսել միմյանց, նրանց վերջին անձնական շփումը տեղի է ունեցել 2023 թվականի դեկտեմբերին Սանկտ Պետերբուրգում՝ Եվրասիական բարձրագույն տնտեսական խորհրդի նիստում։
«Դրանից հետո առաջնորդները գործնականում չեն շփվել, ուստի ևս մեկ անգամ կցանկանայի ընդգծել, որ մենք շատ կարևորում ենք այս երկկողմ հանդիպումը, որը, ինձ թվում է, կօգնի»,- ասել է Ուշակովը։
Կրեմլի ներկայացուցիչը հայտնել է նաև, որ ԵՏՄ-ում նախագահող ՀՀ վարչապետ Նիկոլ Փաշինյանը ղեկավարելու է կազմակերպության գագաթնաժողովը, որը տեղի է ունենալու մայիսի 8-ին Մոսկվայում։
«Հանդիպումը համընկնում է Եվրասիական տնտեսական միության մասին պայմանագրի ստորագրման տասնամյակի հետ»,- նշել է Ուշակովը։
