Գերմանիան ունի այն տպավորությունը, որ այս տարածաշրջանում ռուսական ազդեցությունը բավականին ուժեղ է. Սուրեն Սարգսյան

Ինչպես հայտնի է, մեկնարկել է Գերմանիայի կանցլեր Անգելա Մերկելի այցը Հայաստան: Մինչ այդ նա արդեն հասցրել է լինել հարևան Վրաստանում, իսկ հաջորդիվ կլինի Ադրբեջանում:

Factor.am-ի հարցին` տարածաշրջանային ո՞ ր այցն է առավել առանցքային Մերկելի համար, քաղաքագետ, միջազգայնագետ Սուրեն Սարգսյանը պատասխանեց. «Դժվար է առանձնացնել: Երեքն էլ կարևոր են: Գիտեք, որ Վրաստանն ուզում է անդամակցել Եվրամիությանն ու ՆԱՏՕ-ին: Այդ երկիրը չափազանց ակտիվ է ՆԱՏՕ-ի շրջանակներում: Մասնակցում է խաղաղապահ ուժերի հետ կապված միջոցառումներին: Դա նշանակալից գործոն է, բայց Գերմանիան որոշակի զգուշավորություն է պահում: Նաև վիզաների ազատականացման հարցում էլ է այդ զգուշավորությունը պահում, քանի որ ռիսկեր է տեսնում: Տեղեկացանք, որ Վրաստանին 199 միլիոն եվրո կտրամադրվի, որի միջոցով տարբեր ծրագրեր կիրականացվեն: Ադրբեջանը նույնպես հետաքրքրություն ներկայացնող երկիր է, քանի որ հարուստ է էներգետիկ ռեսուրսներով: Իհարկե,Հայաստանի հետ կապված հետաքրքրություններից մեկը նախորդ տարի կնքված Եվրամիություն-Հայաստան շրջանակային համաձայնագիրն է, որը պետք է վավերացնեն Եվրամիության անդամ երկրների խորհրդարանները: Երեք պետությունների հետ էլ կան հարցեր, որոնք առանցքային են Գերմանիայի կանցլերի համար: Նման տարածաշրջանային այց չի եղել: Կարծում եմ` Գերմանիան ունի այն տպավորությունը, որ այս տարածաշրջանում ռուսական ազդեցությունը բավականին ուժեղ է: Ռուս-ամերիկյան հարաբերությունները շատ լարված են, սակայն ռուս-գերմանական հարաբերություններում նկատելի է դրական տեղաշարժ: Ամերիկյան պատժամիջոցների պատճառով ռուս-գերմանական տնտեսական որոշ ծրագրեր ձախողվեցին: Դրանք վերաբերում էին էներգետիկ ոլորտին»:

Մեր զրուցակիցն ընդգծում է` Գերմանիան Եվրամիության լոկոմոտիվն է:

Ըստ նրա` Բրյուսելում կայացված շատ որոշումներ գերմանական ազդեցությունն ունեն: Վերադառնալով մեր երկրին` միջազգայնագետը նշում է, որ ՀՀ –ին հետաքրքրող հարցերից մեկը Եվրամիության երկրների հետ ազատ վիզային ռեժիմի հարցն է: Սուրեն Սարգսյանը հույս հայտնեց, որ բանակցությունները մոտակա երեք-չորս տարում կտան իրենց արդյունքները:

Հարցին` արժե՞ սպասել ֆինանսական աջակցություն Գերմանիայից, մեր զրուցակիցը պատասխանեց. «Նման հայտարարություն չի եղել, բայց Գերմանիան խոշոր դոնորներից է: Առաջինն իր օգնության ծավալերով ԱՄՆ-ն է, հաջորդում են Գերմանիան և Ճապոնիան: Վերջիններս օժանդակել են թե՛ կառավարությանը, թե՛ մասնավոր ՀԿ-ներին»:

Լևոն Փանոսյան