Կա վտանգ՝ Ադրբեջանը և ՌԴ-ն Փաշինյանին գայթակղիչ առաջարկ անեն, ռեգիոնը Արևմուտքից մեկուսացնելու․ Բորիս Նավասարդյան. ՏԵՍԱՆՅՈՒԹ

Վրաստանում, որը հաճախ նաև ՀՀ-ի ռեգիոնալ դաշնակիցն է համարվում ժողովրդավարության առումով, հուժկու բողոքի ակցիաներ և բախումներ են տեղի ունենում։ ԱԺ շենքի առջև հավաքված ցուցարարներին ցրելու համար ոստիկանները կիրառել են արցունքաբեր գազ, ջրցան մեքենաներ:  Նաև ձերբակալություններ և վիրավորներ են եղել։  Ինչո՞ւ է Վրաստանի իշխանությունը ընդունում «Ռուսական օրենք» անունով հայտնի «Օտարերկրյա գործակալների» օրենքը, ինչի չեղարկման պահանջ է դրվում։ Քաղաքական վերլուծաբան Բորիս Նավասարդյանը պնդում է, թե մեկ ռացիոնալ և բոլորի կողմից ընդունելի պատասխան չկա այս հարցին, սակայն նա թվարկում է որոշ վարկածներ․

«Ամենաակնհայտ վարկածն այն է, որ Բիձինա Իվանիշվիլին պատրաստվում է ընտրությունների, ցանկանում է համոզիչ հաղթանակ տանել «Վրացական երազանք» կուսակցության հետ, և ցանկանում է հնարավորինս չեզոքացնել կամ ռեսուրսազրկել այն կառույցներին, որոնք նույնիսկ քաղաքական չեն։ Դրանք քաղհասարակության կազմակերպություններ են, մեդիաներ, ուղեղային կենտրոններ»։ Բորիս Նավասարդյանը նշեց, որ Վրաստանում տեղի ունեցողը կարող է տեղավորվել նաև Հարավային Կովկասը Արևմուտքից մեկուսացնելու Ռուսաստանի և Ադրբեջանի ծրագրերի հետ։

ՀՀ-ի եվրաինտեգրման պրոցեսը հաճախ է փոխկապակցվում Վրաստանի հետ։ Եվ ունենք տեղեկություններ, որ ՀՀ-ն ԵՄ կառույցներում լոբբինգ է արել Վրաստանին թեկնածուի կարգավիճակ տալու հարցում։ Փոխարենը՝ Վրաստանը թույլատրում է ՀՀ զենք մտցնել։ Վրաստանի՝ ՌԴ-ի ճամբարում հայտնվելը կփակի՞ ՀՀ-ի եվրոպական հեռանկարը, թե՞ Հայաստանը կարող է մնալ որպես կղզի այս ռեգիոնում՝ արևմուտքի հետ խորքային գործակցություն իրականացնող․

«Դա ակնհայտ վտանգ է։ Այո, եթե ռեգիոնալ մեկուսացման սցենարը իրականացվի, կդժվարանա ՀՀ-ի մերձեցումը Արևմուտքի հետ, թեկուզ հենց՝ աշխարհագրական առումով, մյուս կողմից՝ կնվազի ՀՀ-ի հանդեպ Արևմուտքի հետաքրքրությունը։ Մի բան է, եթե խոսքը գնում է երկու երկրի մասին, որոնցից Վրաստանը Սև ծովի հարևանությամբ է, այսինքն՝ այն աշխարհագրության մաս է, որը կարելի է բոլոր առումներով Եվրոպա համարել։ Եվ եթե ՀՀ-ն կտրվում է այդ տանդեմից, իր նկատմամբ հետաքրքրությունը կասկածելի է դառնում»,- ասաց քաղաքական վերլուծաբանը։

Բորիս Նավասարդյանը խոսում է նաև Ղազախստանում Հայաստանի և Ադրբեջանի ԱԳ նախարարների՝ արդեն իսկ համաձայնեցված հանդիպման և դրանից սպասվող արդյունքների, Ադրբեջանի հետ սահմանազատման պրոցեսից դժգոհ մնացած Կիրանց գյուղի բնակիչների պահանջների և ՀՀ կառավարության կողմից դրանց արձագանքների մասին։ Օրեր առաջ կիրանցեցիները Կառավարության շենքում հանդիպել են Նիկոլ Փաշինյանին, սակայն բավարարված չեն եղել։

Բորիս Նավասարդյանը մեկնաբանում է նաև Ռուսաստանի՝ ռեգիոնից հեռանալու հանգամանքը, օրինակ՝ ԼՂ-ից զորքերը հանելու տեսքով։ Զրույցի թեմաների շարքում էին նաև Հայաստանի՝ Եվրամիությանն անդամակցելու հեռանկարը, Արևմուտքի հետ գործակցության կարևորությունը՝ ՀՀ-ի ժողովրդավարական, անվտանգային, տնտեսական և քաղաքական զարգացումն ապահովելու իմաստով, և այն վտանգները, որոնք կարող են լինել, եթե Հարավային Կովկասը մեկուսացվի Արևմուտքից։