14.11.2024 | 23:29
ՀՀ էկոնոմիկայի փոխնախարարի գլխավորած պատվիրակությունն այցելել է Չաբահար նավահանգիստ
Գագիկ Խաչատրյանը շտապօգնության մեքենայով բերվեց դատարան, նիստն ընթանում է դռնփակ
Հասարակություն
30.04.2024 | 16:48
ՊԵԿ նախկին նախագահ Գագիկ Խաչատրյանը շտապօգնության մեքենայով բերվեց դատարան: Շտապօգնության մեքենան մտավ դատարանի բակի փակ հատված և Խաչատրյանի շենք տարան այդ հատվածով։ Գագիկ Խաչատրյանի գործով դատական նիստն ընթանում է դռնփակ ռեժիմով։
Ավելի վաղ Խաչատրյանի պաշտպան Երեմ Սարգսյանն ասել էր, որ միջնորդելու է դռնփակ քննել նիստը, քանի որ Խաչատրյանը չի ցանկանում, որպեսզի հանրությունն իրեն տեսնի իր ներկա առողջական վիճակում:
Նշենք, որ նախկին պաշտոնյայի պաշտպաններն արդեն տևական ժամանակ է` միջնորդում են թույլատրել վիրահատության նպատակով մեկնել արտերկիր, սակայն դատարանը նրան չի թույլատրում լքել Հայաստանը: Խաչատրյանն, ըստ պաշտպանների, հենաշարժողական խնդիրներ ունի և ի վիճակի չէ ներկայանալ դատական նիստերին:
Ի դեպ, ՀՀ գլխավոր դատախազ Աննա Վարդապետյանը ԱԺ պետաիրավական հարցերի հանձնաժողովում դատախազության 2023 թվականի գործունեության մասին հաղորդումը ներկայացնելիս դատական նիստերի ձգձգման պատճառների մասին խոսելիս անդրադարձել էր Գագիկ Խաչատրյանի գործին։
«Գագիկ Խաչատրյանի նիստը մեկ տարուց ավելի է՝ բոլորիդ աչքի առաջ է։ Ես այնքան ուրախ եմ, որ լրագրողները նիստը լուսաբանում են, որովհետև, եթե դա պատմեմ՝ ոչ մեկ ինձ չի հավատա, որ ոնց կարող է 2 նիստով ավարտման ենթակա վարույթը 9 ամսից ավելի տևել։ Եվ իրականում ես ինքս՝ որպես իրավաբան, գործ ունեմ փակուղու հետ, որովհետև նիստը չի ավարտվում։ Դատախազությունն ամեն անգամ այդ նիստերին գնալով լրացուցիչ ռեսուրս է ծախսում, պաշտպանական կողմն է անընդհատ էներգիա վատնում դրա վրա, հասարակությունն է ֆրուստրացվում»,- նշել է գլխավոր դատախազը։
Հիշեցնենք, որ բացի այս գործից Գլխավոր դատախազությունը պահանջ է ներկայացրել, որով ՊԵԿ նախկին նախագահ, Ֆինանսների նախկին նախարար Գագիկ Խաչատրյանից ու նրան փոխկապակցված անձանցից պահանջում է հօգուտ Հայաստանի բռնագանձել շուրջ 200 միավոր անշարժ գույք։
Բացի այդ, դատախազությունը պահանջում է նաև Գագիկ Խաչատրյանից բռնագանձել 13 տրանսպորտային միջոց, մասնակցություն հայաստանյան ու արտասահմանյան 29 իրավաբանական անձում, ավելի քան 1,4 միլիոն դոլարի ավանդ և արժեթուղթ, ավելի քան 23 միլիոն դոլարին համարժեք փոխառությունների պահանջի իրավունք, ավելի քան 23 միլիարդ դրամ, որն, ըստ դատախազության, իրենից ներկայացնում է ապօրինի ծագում ունեցող դրամական միջոցների մնացորդի՝ բարեխիղճ երրորդ անձանց փոխանցված միջոցների ու այլ ծախսված միջոցների հանրագումար։
Մանյա Պողոսյան
