25.06.2026 | 23:51
Արմեն Մելիքբեկյանը մտադիր չէ առաջադրվել ՀՖՖ նախագահի ընտրություններում
Բլինքենն Էր-Ռիադում է, ՀԱՄԱՍ-ը՝ Կահիրեում. Գազայում հրադադարի շուրջ բանակցությունները շարունակվում են
Քաղաքականություն
29.04.2024 | 21:44
Գազայի հատվածի հարավում գտնվող Ռաֆահ քաղաքի վրա իսրայելական հարձակման սպասումով Իսրայելի և ՀԱՄԱՍ-ի միջև զինադադարի գործընթացում միջնորդներն ակտիվացրել են իրենց ջանքերը, գրում է BBC-ի ռուսական ծառայությունը։
Ֆրանսիայի արտաքին գործերի նախարար Ստեֆան Սեժուրնեն երկուշաբթի հայտարարել է, որ Գազայի հատվածում հրադադարի շուրջ բանակցություններն առաջընթաց են ապրում: Սեժուրնեն Էր-Ռիադում բանակցություններ կվարի արաբական երկրների նախարարների, ինչպես նաև Պաղեստինի ինքնավարության նախագահ Մահմուդ Աբբասի հետ։
«Մենք կքննարկենք պատանդների ազատ արձակումը, հումանիտար իրավիճակը և հրադադարը։ Գործընթացը շարունակական է, բայց միշտ պետք է զգույշ լինել այս քննարկումներում և բանակցություններում։ Իրավիճակը Գազայում աղետալի է, և մենք հրադադարի կարիք ունենք»,- Reuters-ին ասել է Սեժուրնեն Համաշխարհային տնտեսական ֆորումի (WEF) շրջանակում:
Միաժամանակ, Սաուդյան Արաբիա է ժամանել ԱՄՆ պետքարտուղար Էնթոնի Բլինքենը։ Սա նրա յոթերորդ ուղևորությունն է Մերձավոր Արևելք՝ անցյալ տարվա հոկտեմբերի 7-ին Իսրայելի և ՀԱՄԱՍ-ի միջև պատերազմի սկսվելուց հետո: Սպասվում է, որ նա Էր-Ռիադում կհանդիպի Սաուդյան Արաբիայի բարձրաստիճան պաշտոնյաների հետ՝ քննարկելու թագավորության և Իսրայելի միջև հարաբերությունների կարգավորմանն ուղղված ջանքերը:
Հնարավոր գործարքը ներառում է Վաշինգտոնի կողմից Էր-Ռիադի հետ պաշտպանության և անվտանգության, ինչպես նաև միջուկային համագործակցության երկկողմ համաձայնագրերի կնքումը։ Բլինքենը նաև ավելի լայն հանդիպում կանցկացնի արաբական հինգ պետությունների՝ Կատարի, Եգիպտոսի, Սաուդյան Արաբիայի, Արաբական Միացյալ Էմիրությունների և Հորդանանի ներկայացուցիչների հետ։
Պետքարտուղարության բարձրաստիճան պաշտոնյայի խոսքով՝ բանակցությունների հիմնական թեման լինելու է պատերազմի ավարտից հետո Գազայի հատվածի կառավարման հնարավոր մեխանիզմը։ Էր-Ռիադից Բլինքենը կմեկնի Հորդանան և Իսրայել, որտեղ ուղևորությունը կկենտրոնանա Գազայում հումանիտար սարսափելի իրավիճակի բարելավման ջանքերի վրա:
ՀԱՄԱՍ-ի պատվիրակությունն իր հերթին մեկնում է Կահիրե՝ հրադադարի շուրջ բանակցելու համար, երեկ Reuters-ին հայտնել է խմբավորման ներկայացուցիչը:
ՀԱՄԱՍ-ի պաշտոնյաները կիրակի հայտնել են, որ Գազայում խմբավորման ղեկավարի տեղակալ Խալիլ ալ-Հայայի գլխավորած պատվիրակությունը կքննարկի հրադադարի առաջարկը, որն Իսրայելը ՀԱՄԱՍ-ին է փոխանցել Կատարի և Եգիպտոսի միջնորդների միջոցով շաբաթ օրը:
