30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Տաջիկստանի ԱԳՆ-ն ահազանգում է՝ Մոսկվայի օդանավակայաններում հազարից ավելի տաջիկստանցիներ են պահվում
Քաղաքականություն
29.04.2024 | 14:05
Տաջիկստանի ԱԳ նախարարությունը հայտնում է, որ Մոսկվայի օդանավակայաններում պահվում են երկրի հազարից ավելի քաղաքացիներ, որոնք փորձում են հասնել Ռուսաստան, գրում է Current time-ը:
Նշվում է, որ տաջիկստանցիները պահվում են ոչ նորմալ սանիտարահիգիենիկ պայմաններում և չեն ապահովվում տաք սնունդով։
Տաջիկստանի ԱԳՆ-ի տվյալներով՝ միայն «Վնուկովո» օդանավակայանի ժամանակավոր պահման գոտում մինչև ապրիլի 28-ը երկրի 954 քաղաքացի է գտնվել, որոնց թվում՝ ռուսական բուհերում սովորող ուսանողներ։ Ժամերով սպասելուց հետո նրանցից միայն 322-ին են թույլ տվել սահմանային հսկողությունն անցնել։ 306 մարդու պատրաստվում են հետ ուղարկել հայրենիք։
«Նման սահմանափակող միջոցները կիրառվում են բացառապես Տաջիկստանի քաղաքացիների նկատմամբ»,- ասվում է ԱԳՆ հայտարարության մեջ։
Նշվում է, որ բարդ իրավիճակ է նաև «Ժուկովսկի», «Դոմոդեդովո» և «Շերեմետևո» օդանավակայաններում. տասնյակ մարդիկ պահվում են այնտեղ՝ ժամանակավոր պահման գոտում։
ՌԴ իշխանությունները դեռևս չեն մեկնաբանում այս իրավիճակը։
Ավելի վաղ էլ Տաջիկստանի ԱԳՆ-ն խորհուրդ էր տվել իր քաղաքացիներին հրաժարվել ՌԴ մեկնելուց։ Թեև գերատեսչության հայտարարությունն ուղղակիորեն չի անդրադառնում դրան, մի շարք իրավապաշտպաններ կարծում են, որ դրա պատճառը Տաջիկստանի քաղաքացիների նկատմամբ ճնշումներն են։ Նրանք Ռուսաստանում բախվում են ազգատյացության նոր ալիքի «Կրոկուս սիթի հոլլ»-ում տեղի ունեցած ահաբեկչությունից հետո, քանի որ գործով կալանավորվածների մեծ մասը Տաջիկստանի քաղաքացիներ են։
