25.04.2026 | 21:33
Մանվել Խնձրցյանը և Վազգեն Թևանյանը տպավորիչ հաղթանակներով դարձան ԵԱ-ի բրոնզե մեդալակիրներ. ՏԵՍԱՆՅՈՒԹ
Կառավարությունը 3 մլրդ դրամի արտոնություն տվեց «Ֆարմատեք» դեղագործական ընկերությանը
Տնտեսություն
25.04.2024 | 11:46
Կառավարությունը չզեկուցվող հարցերի փաթեթում 3 մլրդ դրամ արտոնություն տվեց «Ֆարմատեք» դեղագործական ընկերությանը՝ հումք և սարքավորումներ ներմուծելու համար։
Ըստ ընկերության ներկայացրած հիմնավորման՝ հումքը նախատեսվում է օգտագործել ներերակային ինֆուզիոն հեղուկների, ամպուլների, աչքի կաթիլների արտադրության, իսկ սարքավորումները նոր արտադրական տարածքի կառուցման համար։
«Ֆարմատեք»-ը ՀՀ-ում հիմնադրված արտերկրյա դեղարտադրող ընկերություն է և մասնագիտացված է հիմնականում 64 տեսակի ներերակային լուծույթների և 5 տեսակի աչքի կաթիլների արտադրության մեջ, որոնց արտադրությունը սկսվել է 2005 թվականից:
Ըստ իրավաբանական անձանց պետական ռեգիստրի՝ (e-register) ընկերության բաժնետեր է Վաչե Մանուկյանը, ում մասնաբաժինը նշված չէ։
Նկատենք, որ Վաչե Մանուկյանը 29,7% մասնաբաժին ունի նաև դեղորայք ներկրող «Արֆարմացիա» ՓԲԸ-ում, որի մեկ այլ՝ 1997 թվականից բաժնետեր է նաև Առողջապահության նախարար Անահիտ Ավանեսյանի մայրը՝ Մարգուշ Վարդանյանը՝ 31% մասնաբաժնով։
Ըստ իրավաբանական անձանց պետական ռեգիստրի՝ «Արֆարմացիային» առնչվող միջանկյալ ընկերությունների բաժնում նշված է հենց «Ֆարմատեք» ՓԲԸ-ն։
Համապատասխանաբար նույն մասնաբաժիններով Մարգուշ Վարդանյանն ու Վաչե Մանուկյանը ներկայանում են նաև «Արմֆարմացիա» դեղատուն ՍՊԸ-ին առնչվող հայտարարագրում (նույնանուն ՍՊԸ-ն հիմնադրվել է 2019 թվականի հուլիսի 22–ին):
«Ֆարմատեք»-ի ներկայացրած հիմնավորման համաձայն՝ ընկերությունը ներկայումս առկա է 80 աշխատատեղ՝ 470 հազ դրամ միջին ամսական աշխատավարձով։ Ներդրումային ծրագրի շրջանակներում մինչև 2027 թվականը աշխատատեղերի թիվը հասցնել մինչև 94-ի՝ 429 հազ դրամ միջին ամսական աշխատավարձով։
Նաև նշվում է, որ արտոնության առկայությունը լուրջ խթան կհանդիսանա նոր ներդրումային ծրագրերի իրականացման և որպես հետևանք նոր աշխատատեղերի ստեղծման, ներդրումների ներգրավման, տեղական արտադրության և արտահանման խթանման համար:
Մանյա Պողոսյան
