Նոյեմբերյանում ևս ճանապարհ են փակել, ԵԿՄ տարբերանշանով ավտոմեքենան հայտնվեց բազմության մեջ

Նոյեմբերյան խոշորացված համայնքում ևս լարված իրավիճակ է, այստեղ նույնպես մի խումբ քաղաքացիներ փակել են ճանապարհը։ 24news-ի հրապարակված տեսանյութից երևում է, որ ԵԿՄ տարբերանշանով ավտոմեքենան հայտնվեց բազմության մեջ, մարդիկ փակեցին ճանապարհը՝ թույլ չտալով առաջ շարժվել։

«Երկրապահի «Վիլիսը» քշեց մեկի գլուխը ջարդեց։ Մեկի ոտքն էլ կոտրվել է»,– լրագրողների հետ զրույցում ասաց Նոյեմբերյանի բողոքի ակցիայի մասնակիցներից մեկը։

ՆԳՆ ոստիկանության լրատվության վարչությունից Factor.am-ին հայտնեցին, որ միջադեպի վերաբերյալ տեղեկություն չունեն, բայց կուսումնասիրեն, թե ինչ է տեղի ունեցել Նոյեմբերյանում։

Հավելենք, որ երկու օր առաջ մեկ այլ միջադեպ էր տեղի ունեցել Ոսկեպարի ճանապարհահատվածում․ ԵԿՄ տարբերանշանով «ՈՒԱԶ» մակնիշի մեքենայի վարորդը փորձել էր անցնել՝ ճեղքելով ճանապարհը փակած բնակիչների պատնեշը։ Ճանապարհը փակած քաղաքացիները, որոնց թվում էին նաև «Մարտական եղբայրություն» միաբանության անդամներ և ԱԺ «Հայաստան» խմբակցության պատգամավոր Գառնիկ Դանիելյանը, փորձել էին ձեռքերով հետ հրել մեքենան՝ նաև հարվածելով ու կոտրելով դիմապակին։ Չնայած ոստիկանական մեծաթիվ ուժերի ներկայությանը՝ բախումը կանխել չէր հաջողվել․ մեքենայի վրայից մեկը ցատկել էր քաղաքացիների վրա ու ոտքերով հարվածել։

Նշենք, որ Տավուշի մարզում Ոսկեպար, Կիրանց և հարակից համայնքների մի խումբ բնակիչներ դեռ շարունակում են փակ պահել Հայաստան- Վրաստան միջպետական սահմանի Ոսկեպար-Կիրանց ճանապարհահատվածը։

Ի դեպ, ՆԳՆ-ից էլ փոխանցում են, որ Բաղանիս-Ոսկեպար ավտոճանապարհը ոստիկանները փակել են հարակից տարածքում իրականացվող ականազերծման աշխատանքներն ապահովելու և քաղաքացիների մուտքը մոտակա ականապատ տարածքներ թույլ չտալու համար, վերջիններիս անվտանգությունն ապահովելու նկատառումով: Ըստ ՆԳՆ-ի՝ Բաղանիս-Ոսկեպար հատվածում այսօր նախատեսվում է սահմանազատման հետ կապված աշխատանքների իրականացում:

Հիշեցնենք, որ երեկ երեկոյան Տավուշի մարզի վարչական ղեկավարներն ու մի քանի բնակիչներ հանդիպել են Մհեր Գրիգորյանին։ Հավելենք, որ վարչապետ Նիկոլ Փաշինյանի որոշմամբ ստեղծվել է «Հայաստանի և Ադրբեջանի միջև պետական սահմանների սահմանազատման և սահմանների անվտանգության հանձնաժողովին» կից աշխատանքային խումբ։ Խմբի անդամներ են ընտրվել Տավուշի համայնքների ղեկավարները, ինչպես նաև մի քանի բնակիչներ։