14.11.2024 | 23:29
ՀՀ էկոնոմիկայի փոխնախարարի գլխավորած պատվիրակությունն այցելել է Չաբահար նավահանգիստ
«Հրահանգել է մեքենան քշել քաղաքացիների վրա ու ճզմել»․ «Մարտական եղբայրություն»-ը պնդում է՝ սադրանք էր. ՏԵՍԱՆՅՈՒԹ
Քաղաքականություն
22.04.2024 | 20:30
Հայաստան-Վրաստան միջպետական ճանապարհին երեկ բողոքի ակցիայի ժամանակ միջադեպ է տեղի ունեցել։ ԵԿՄ տարբերանշանով «ՈՒԱԶ» մակնիշի մեքենայի վարորդը փորձել է անցնել՝ ճեղքելով ճանապարհը փակած բնակիչների պատնեշը։ Ճանապարհը փակած քաղաքացիները, որոնց թվում էին նաև «Մարտական եղբայրություն» միաբանության անդամներ և ԱԺ «Հայաստան» խմբակցության պատգամավոր Գառնիկ Դանիելյանը, փորձել են ձեռքերով հետ հրել մեքենան՝ նաև հարվածելով ու կոտրելով դիմապակին։
Չնայած ոստիկանական մեծաթիվ ուժերի ներկայությանը՝ բախումը կանխել չի հաջողվել․ մեքենայի վրայից մեկը ցատկել է քաղաքացիների վրա ու ոտքերով հարվածել։ Ոստիկանները միայն այդ ժամանակ են միջամտել։
«Մարտական եղբայրություն» միաբանության անդամները Տավուշ էին մեկնել բնակիչների խնդրանքով և խաղաղ ակցիա անցկացրել՝ մինչև այն պահը, երբ «ՈՒԱԶ» մակնիշի մեքենան փորձել է անցնել փակված ճանապարհով՝ պատմում է միաբանության անդամ Ռուբեն Դալլաքյանը։
«Տևական ժամանակ ամեն ինչ շատ հանդարտ էր ընթանում և, կարծես թե, պետք էր ինչ-որ մի բան սադրել։ Ժամանում է մի մեքենա, և Յուրա անունով մի մարդ, որը ԵԿՄ Տավուշի մարզային կառույցի նախագահն է, պահանջում է, որպեսզի բացեն ճանապարհը։ Մեր անդամներից Արման Պետրոսյանը բացատրում է, որ ակցիա է, պետք չէ բացել ճանապարհը, և Յուրան հրահանգում է մեքենան քշել քաղաքացիների վրա, ճզմել»,- պատմում է Ռուբեն Դալլաքյանը։
Քննչական կոմիտեն հայտնում է, որ «առերևույթ խուլիգանական գործողությունները փորձել են կանխել ոստիկանության ծառայողները, սակայն այդ անձինք դիմել են փախուստի»: Միաբանությունից հակադարձում են՝ որևէ մեկը փախուստի չի դիմել, իսկ ոստիկաննները ցուցաբերել են անգործություն։ Խուլիգանության, ուրիշի գույքը ոչնչացնելու կամ վնասելու և ֆիզիկական ներգործության հոդվածներով նախաձեռնվել է քրեական վարույթ։
««Մարտական եղբայրություն» հասարակական կազմակերպության 7 անդամներ հանցանք կատարած լինելու վերաբերյալ անմիջականորեն ծագած հիմնավոր կասկածի առկայության հիմքով, վարույթ իրականացնող մարմնի համապատասխան որոշումներով ձերբակալվել են»,- տեղեկացնում են ՔԿ-ից։
«Մարտական եղբայրություն» միաբանությունից պնդում են՝ մեղադրանքներն անհիմն են, իսկ իրենք ենթարկվում են քաղաքական հետապնդումների։
Դալլաքյանի խոսքով՝ չնայած միաբանության 7 անդամ է ձերբակալվել, սակայն միայն չորսն են միջադեպին ներկա եղել։ Թե որտեղից և ինչու են ձերբակալվել մյուսները, պարզ չէ։
Վարույթն իրականացնող մարմնից Factor.am-ին տեղեկացրին, որ ճանապարհը փակած և պատնեշ կազմած քաղաքացիների ուղղությամբ մեքենա վարելը, այնուհետև քաղաքացու՝ մեքենայի վրայից ցատկելու դրվագը ևս նախաձեռնված վարույթի շրջանակում քննության առարկա են դարձել։
Ուշագրավ է, որ Քննչական կոմիտեի հաղորդագրությունում ոչ մի խոսք չկա ԵԿՄ-ի մասին։ Իսկ ԵԿՄ-ից մեկնաբանություն ստանալ չհաջողվեց, մեր հեռախոսազանգերն անպատասխան մնացին։
Մանրամասները՝ տեսանյութում։
Արփի Հակոբյան
