09.09.2026 | 23:17
Ինչ են քննարկել Փաշինյանը և Մակրոնը. Կառավարությունը մանրամասներ է ներկայացրել
Ռուսական ուժերը հարվածել են Դնեպրին․ 8 մարդ զոհվել է, առնվազն 25-ը՝ վիրավորվել
Քաղաքականություն
19.04.2024 | 12:37
Դնեպրի վրա ռուսական հրթիռային հարձակման թիրախում հինգ հարկանի բնակելի շենք է հայտնվել։ Շենքում հրդեհ է բռնկվել, այն մասնակի ավերվել է, հայտնել է Դնեպրոպետրովսկի շրջանային վարչակազմի ղեկավար Սերգեյ Լիսակը, գրում է Current Time-ը։
Լիսակի տվյալներով՝ 8 զոհ և առնվազն 25 վիրավոր կա։ Հինգ հարկանի շենքի փլատակների տակ կարող են մարդիկ լինել։ Բացի բնակելի շենքից՝ վնասվել են երկու ենթակառուցվածքային օբյեկտներ։
Ուկրաինայի նախագահ Վլադիմիր Զելենսկին արձագանքել է Դնեպրի վրա հարձակմանը և արևմտյան գործընկերներին կոչ արել ավելի շատ ՀՕՊ համակարգեր տրամադրել։
«Ռուսաստանը պետք է պաստասխան տա իր ահաբեկչության համար և յուրաքանչյուր հրթիռ, յուրաքանչյուր «Շահեդ» պետք է խոցվի։ Աշխարհը կարող է երաշխավորել դա, գործընկերներն ունեն անհրաժեշտ հնարավորությունները։ Դա ապացուցվել է Մերձավոր Արևելքի երկնքում և պետք է աշխատի Եվրոպայի երկնքում»,- ասել է Զելենսկին։
Ռուսաստանը հարձակվել է նաև Դնեպրոպետրովսկի մարզի այլ բնակավայրերի վրա։ Պավլոգրադի ձեռնարկություններից մեկը վնասվել է, Սինելնիկովոյում կան զոհեր և վիրավորներ, որոնց թվում՝ երեխաներ։ Նրանցից մեկի վիճակը ծանր է։ Չորս տուն մասամբ ավերվել է, ևս ութը՝ վնասվել։
Ապրիլի 18-ի երեկոյան Ռուսաստանը հրետանու կիրառմամբ գնդակոծել է Նիկոպոլը։ Մարգանեց համայնքին ևս գիշերը հարված է հասցվել։
