20.06.2026 | 19:55
Նյու Յորքում հրդեհ է բռնկվել պատմական հուշարձանի կարգավիճակ ունեցող եկեղեցում, փլուզվել է զանգակատունը
Վրաստանում իրավապահներն իրենք են «վտանգ ստեղծել մարդկանց առողջության համար»․ DRI
Քաղաքականություն
17.04.2024 | 23:07
Ժողովրդավարության հետազոտական ինստիտուտի (DRI) հայտարարության համաձայն՝ Վրաստանի խորհրդարանի դիմաց ապրիլի 16-ին տեղի ունեցած հանրահավաքում վրացի իրավապահներն իրենք են «վտանգ ստեղծել մարդկանց առողջության համար» և օգտագործել են հատուկ միջոցներ՝ «առանց համապատասխան իրավական հիմքերի», փոխանցում է Գրուզիա օնլայն:
«Ապրիլի 16-ին հազարավոր մարդիկ հավաքվել էին Վրաստանի խորհրդարանի մոտ՝ բողոքելու «ռուսական օրենքի» դեմ։ Վրաստանի իշխանությունները կրկին ուժ են կիրառել խաղաղ ցուցարարների նկատմամբ։ Լրատվամիջոցների կադրեր են հրապարակել, թե ինչպես են մի քանի խաղաղ ցուցարարներ վիրավորվել հատուկ տեխնիկայի կիրառման արդյունքում։ Ժամը 22-ի սահմաններում ՆԳՆ աշխատակիցները խաղաղ ցուցարարների դեմ սկսել են ակտիվ կիրառել հատուկ զենք, հավանաբար, պղպեղի սփրեյ: Ավելի ուշ՝ ժամը 00:30-ի դրությամբ, ՆԳՆ աշխատակիցները կրկին օգտագործել են պղպեղի սփրեյ՝ առանց նախազգուշացման կամ համապատասխան օրինական հիմքերի»,- ասվում է հայտարարության մեջ։
Նշվում է նաև, որ Վրաստանի օրենսդրության համաձայն՝ բողոքի ակցիաների ժամանակ հատուկ տեխնիկայի օգտագործումը պետք է համապատասխանի օրինականության և համաչափության չափանիշներին։
«Իրավապահ մարմինների աշխատակիցների կողմից հարկադրանքի միջոցների կիրառումը, ներառյալ՝ ակտիվ հատուկ միջոցները, թույլատրվում է օրինական նպատակին հասնելու համար, ծայրահեղ անհրաժեշտության դեպքում, միայն այն դեպքում, երբ հավաքը դառնում է բռնի։ Տագնապալի է, որ իրավապահները ֆիզիկական բռնության են ենթարկել մի քանի ցուցարարների, այդ թվում՝ լրագրողների ևւ քաղաքական գործիչների։ Իրավապահ մարմինների աշխատակիցների առաջնային պարտականությունը քաղաքացիների կարգուկանոնն ու անվտանգությունը պաշտպանելն է։ Ցավոք, այսօր խորհրդարանի մոտ տեղի ունեցած բողոքի ցույցի ժամանակ իրավապահներն իրենք են վտանգել մարդկանց առողջությանը։ Իրավապահների կողմից հատուկ տեխնիկայի ապօրինի կիրառումը և հանրահավաքի մասնակիցների նկատմամբ ֆիզիկական բռնությունն ուղեկցվել են վարչական ձերբակալություններով»,- ասվում է DRI-ի հայտարարությունում։
