07.10.2026 | 12:56
Կոստանյանը ներկայացրել է ենթակառուցվածքների ապաշրջափակմամբ ստեղծվող տնտեսական հնարավորությունները
Բաքուն պաշտոնապես չի հաստատում ռուս խաղաղապահների դուրս բերման տեղեկությունը
Քաղաքականություն
17.04.2024 | 14:33
Սոցցանցերի ադրբեջանական տիրույթում նախօրեից տեսանյութեր են տարածվում, թե ինչպես են հեռանում ռուս խաղաղապահների 20 զրահափոխադրիչներից բաղկացած ավտոշարասյունը, մեկ տասնյակ վառելիքի տանկեր և մի քանի բեռնատար։ Ըստ տեսանյութերի հեղինակների՝ կադրերը նկարահանվել են Արցախին հարակից Թերթերի և Գերանբոյի շրջաններում։
Ի պատասխան ադրբեջանական Թուրան գործակալության հարցմանը՝ Ադրբեջանի ուժային կառույցներից հայտնել են, որ տարածվող տեսանյութերը այսօրվան չեն վերաբերվում։ ՊՆ-ն ու ՆԳՆ-ն չեն հաստատել, որ խաղաղապահների զինտեխնիկայի մի մասը դուրս է բերվում։ Պաշտոնական Բաքուն այլ մեկնաբանություններ դեռ չի հնչեցրել։
Ավելի վաղ ՌԴ նախագահի մամուլի խոսնակ Դմիտրի Պեսկովը հաստատել էր, որ սկսվել է ռուս խաղաղապահների դուրսբերման գործընթաց։
Հիշեցնենք, որ նախօրեին ադրբեջանական լրատվամիջոցները հայտնել էին, թե հայկական Դադիվանք վանական համալիրի պաշտպանությունը ռուս խաղաղապահները փոխանցել են ադրբեջանական ոստիկանությանը։ Դրանից հետո ռուս խաղաղապահների տեխնիկայի շարասյունների տեսանյութերը սկսեցին տարածվել։
Ադրբեջանական իշխանամերձ ԶԼՄ-ներն էլ սկսեցին տեղեկություններ տարածել, թե վանքն ադրբեջանական ոստիկանությանը հանձնելով, սկսվել է Արցախում տեղակայված ռուսական խաղաղապահ զորախմբի դուրսբերման գործընթացը։
Ի դեպ, ապրիլի սկզբին Ադրբեջանի ականազերծման գործակալության (ANAMA) խորհրդի նախագահ Վուգար Սուլեյմանովը հայտարարել էր, թե Արցախում տեղակայված ռուս խաղաղապահները ներգրավվելու են ականազերծման աշխատանքնում։ Նրա խոսքով՝ համապատասխան աշխատանքներ են տարվում ականազերծման գործողություններին ռուսական խաղաղապահ զորակազմի մասնակցության փաստաթղթավորման հետ կապված։
Էմմա Չոբանյան
