ԱՄՆ-ը և Կանադան խստացրել են Բելառուսի դեմ պատժամիջոցները

ԱՄՆ-ը և Կանադան ընդլայնել են Բելառուսի դեմ պատժամիջոցների ցանկը։ ԱՄՆ Ֆինանսների նախարարության արտաքին ակտիվների վերահսկման գրասենյակը (OFAC) «սև ցուցակում» է ներառել 10 անհատի և 12 ընկերությունների, որոնք կապված են Բելառուսի պաշտպանության ոլորտի և կառավարության հետ, գրում է DW-ի ռուսական ծառայությունը:

Անձնական պատժամիջոցներ են սահմանվել Բելառուսի, Լիբանանի, Սիրիայի, Սլովակիայի և Շվեդիայի քաղաքացիներ Ալեքսանդրա Օքսենչուկի, Ալհայթամ Ալիի, Դմիտրի Բրահիմի, Սերգեյ Չերգեյկոյի, Մոհամմադ Դեյրիի, Դմիտրի Միխալցովի, Տատյանա Պրոտոպովիչի, Սամեր Ռայայի, Նորա Յագմուրի և Օլեգ Յուրչիկի նկատմամբ, ասված է գերատեսչության կայքում տարածված հաղորդագրության մեջ:

Ըստ ԱՄՆ գանձապետարանի՝ նրանք կապված են «սև ցուցակում» հայտնված կազմակերպությունների հետ և կասկածվում են Բելառուսում ու Ռուսաստանի Դաշնությունում զենքի արտադրության համար բաղադրիչներ մատակարարելու մեջ։

Սահմանափակումներ են մտցվել նաև Բելառուսից, Կիպրոսից, Իրաքից, Չինաստանից, Սլովակիայից և Թուրքիայից կազմակերպությունների նկատմամբ։ Ի թիվս այլոց՝ ԱՄՆ-ի «սև ցուցակում» ներառվել է «StankoGomel» հաստոցաշինական ձեռնարկությունը, որը սարքավորումներ է մատակարարում ռուսական պաշտպանական ընկերություններին, ինչպես նաև Բելառուսի զինված ուժերի մատակարարին, «AGAT-Control Systems» ընկերությանը և նրա չորս դուստր ձեռնարկություններին:

«Սև ցուցակում» է հայտնվել Իրաքի «Black Shield» սպառազինության ընկերությունը, որը, ըստ Վաշինգտոնի, զենք է գնել և վերավաճառել բելառուսական Kidma Tech ընկերությանը։ Իր հերթին, չինական Shenzhen 5G High-Tech Innovation-ը կապված է Peleng ԲԲԸ-ի հետ, որն արդեն պատժամիջոցների տակ է։

Սրա հետ մեկտեղ, 21 բելառուս է ընդգրկվել Կանադայի պատժամիջոցների ցուցակում։ Ըստ Օտտավայի՝ այդ քաղաքացիները կապված են Բելառուսում 2020 թվականի նախագահական ընտրություններից հետո սկսված բռնաճնշումների և զանգվածային բողոքի ցույցերի հետ։ Պատժամիջոցների տակ են հայտնվել Բելառուսի ուղղիչ գաղութների ղեկավարները և «ցուցարարների» գործերով որոշումներ կայացրած դատավորները։