23.11.2024 | 12:34
ԱԺ պատգամավորներ կգործուղվեն Մոսկվա
Իսրայելը խոստանում է պատասխանել Իրանի հարձակմանը
Քաղաքականություն
16.04.2024 | 10:51
Իսրայելի պաշտպանության բանակի շտաբի պետ Հերզի Հալեվին ասել է, որ իր երկիրը կպատասխանի Իրանի վերջին հարձակմանը, սակայն չի հստակեցրել, թե ինչպես և երբ դա տեղի կունենա, մինչդեռ համաշխարհային առաջնորդները դեմ են արտահայտվել պատասխան քայլերին՝ փորձելով խուսափել Մերձավոր Արևելքում բռնությունների պարույրից, գրում է VOA-ն:
Գեներալ-լեյտենանտ Հալեվին նշել է, որ Իսրայելը դիտարկում է հետագա գործողությունները, սակայն մանրամասներ չի ներկայացրել։ Իսրայելի պաշտպանության բանակի խոսնակ, կոնտրադմիրալ Դանիել Հագարին իր հերթին հայտարարել է, որ Իսրայելը կպատասխանի՝ «երբ հարմար գտնի»:
Վարչապետ Բենիամին Նեթանյահուն հանդիպումներ է ունենում բարձրաստիճան պաշտոնյաների հետ՝ քննարկելու հնարավոր պատասխանը։ ԱՄՆ Կոնգրեսի Ներկայացուցիչների պալատի մեծամասնության առաջնորդ Սթիվ Սքալիզի հետ զրույցում Նեթանյահուն ասել է, որ «Իսրայելը կանի անհրաժեշտ ամեն ինչ իրեն պաշտպանելու համար»։
Հիշեցնենք` անցած շաբաթվա վերջին Իրանը հարյուրավոր անօդաչու թռչող սարքեր, բալիստիկ և թևավոր հրթիռներ էր արձակել Իսրայելի ուղղությամբ։ Իսրայելական բանակը հայտնել էր, որ ԱՄՆ-ի գլխավորած կոալիցիայի հետ համաձայնությամբ հակաօդային պաշտպանության և օդանավերի կողմից խոցվել է անօդաչու թռչող սարքերի և հրթիռների 99%-ը:
