14.12.2025 | 12:28
«ՀԷՑ»-ը տեղեկացնում է. ուժեղ քամիները հոսանքազրկումների պատճառ են դարձել
Բռնակցված Ղրիմում միգրանտներին աշխատանքի ընդունելու սահմանափակումներ են մտցրել
Քաղաքականություն
15.04.2024 | 19:47
Բռնակցված Ղրիմում արգելել են ընթացիկ տարում ներգաղթյալներին աշխատանքի ընդունել 35 տեսակի տնտեսական գործունեության ոլորտում, ասվում է ՌԴ կառավարության հրամանագրում։ Ներգաղթյալներին կարգելվի աշխատանքի ընդունել, մասնավորապես, բուսաբուծության և անասնաբուծության, սննդի արտադրության, էլեկտրաէներգիայի, գազի մատակարարման, թափոնների վերամշակման և հեռացման, մեծածախ և մանրածախ առևտրի մեջ (բացառությամբ ավտոմոբիլային տրանսպորտի և մոտոցիկլետների առևտրի), ինչպես նաև արգելվում է աշխատել կրթության և մշակույթի ոլորտներում, փոխանցում է The Moscow Times-ը։
Տարածաշրջանի «ղեկավար» Սերգեյ Աքսյոնովն իր Telegram-ալիքում հայտարարել է, որ աշխատանքային միգրանտների անվերահսկելի ներկայությունը Ղրիմի և Ռուսաստանի տարածքում, ընդհանուր առմամբ, անընդունելի է։
«Աշխատանքային միգրացիան պետք է ավելի վերահսկելի դառնա, իսկ օրինախախտներին պետք է երաշխավորվի Ռուսաստանից վտարումը»,- գրել է նա։
Նաև, ըստ Աքսյոնովի, Ղրիմում նախատեսում են մինչև մայիսի 1-ը պատրաստել օրենսդրական նախաձեռնություններ, որոնք ուղղված կլինեն կեցության մասին հրամանը խախտելու համար պատիժը խստացնելուն և Ռուսաստանի Դաշնության օրենսդրությունը խախտող օտարերկրյա քաղաքացիների արտաքսումն ապահովելուն։
Նախկինում միգրանտների աշխատանքի արգելք էր մտցվել ՌԴ Չելյաբինսկի, Մագադանի, Կալինինգրադի, Տուլայի, Նովոսիբիրսկի, Տյումենի, Կալուգայի և Նովգորոդի մարզերում, ինչպես նաև Խանտի-Մանսիյսկի ինքնավար օկրուգում՝ Յուգրայում և Յակուտիայում:
Մարտին Պետդումայի անվտանգության և կոռուպցիայի դեմ պայքարի հանձնաժողովի անդամ Միխայիլ Շերեմետը հայտարարել էր, որ Ուկրաինայի հետ պատերազմի ժամանակ միգրանտների մուտքը Ռուսաստան պետք է սահմանափակվի։
Նրա կարծիքով՝ որոշ այցելուներ «կուրորեն օգտագործվում են» ռուսներին վնասելու, այդ թվում՝ ահաբեկչական հարձակումներ իրականացնելու և այլ «իրավիճակի ապակայունացման» «գործիքների» վերածելու համար։
