12.08.2026 | 00:10
«Արարատ-Արմենիան» դուրս մնաց Չեմպիոնների լիգայից. ՏԵՍԱՆՅՈՒԹ
Ադրբեջանի ընդդիմությունը ապրիլի 21-ին հանրահավաք կանցկացնի
Քաղաքականություն
15.04.2024 | 23:17
Ադրբեջանի ընդդիմությունը քննարկումներից հետո որոշել է ապրիլի 21-ին հանրահավաք անցկացնել։ Ընդդիմադիր ուժերին միավորող Ժողովրդավարական ուժերի ազգային խորհուրդը հանրահավաքը նշանակել է ապրիլի 21-ին։
Ակցիան իրականացվում է քաղբանտարկյալների ազատ արձակման, ընտրական բարեփոխումների, ԼՂ-ից ռուս զինվորականների դուրսբերման, Ադրբեջանի և ԵՄ-ի միջև նոր համաձայնագրի ստորագրման, ցամաքային սահմանների բացման, աշխատավարձերի, կենսաթոշակների բարձրացման պահանջներով։
Ադրբեջանական լրատվամիջոցները հայտնում են, որ հանրահավաքի անցկացման կազմկոմիտեն այսօր Բաքվի գործադիր իշխանությանն է ուղարկել ակցիայի անցկացման ծանուցումը։
Ակնկալվում է, որ հանրահավաքը կանցկացվի ապրիլի 21-ին ժամը 15.00-17.00 երեք վայրերից մեկում՝ մետրոյի «Մայիսի 28-ի» կայարանի դիմացի հրապարակում, մետրոյի «Նարիմանովի» կայարանի դիմացի հրապարակում կամ «Մեհսուլ» մարզադաշտում։
Ադրբեջանի ընդդիմության վերջին խոշոր հանրահավաքը տեղի է ունեցել 2019 թվականի հունվարի 19-ին «Մեհսուլ» մարզադաշտում։ Այնուհետև կորոնավիրուսի համավարակի սկսվելուց հետո հավաքներն արգելվել են, անցկացվող փոքր բողոքի ցույցերը՝ ճնշվել ոստիկանության կողմից։
Նշենք, որ ընդդիմադիր «Ժողովրդական ճակատ» կուսակցությունն օրերս է հայտարարություն տարածել երկրում իշխանությունների կողմից իրականացվող բռնաճնշումների վերաբերյալ։ Ընդդիմադիր կուսակցությունը միջազգային կազմակերպություններին և ժողովրդավարական աշխարհին կոչ էր ուղղել առաջնահերթ ուշադրություն դարձնել քաղբանտարկյալների ազատությանը և Ադրբեջանի քաղաքացիների հիմնարար իրավունքների ու ազատությունների իրականացմանը երկրի կառավարության հետ շփումներում և պատժամիջոցներ սահմանել նախագահ Իլհամ Ալիևի ավտորիտար ռեժիմի նկատմամբ։
Էմմա Չոբանյան
