ԱՄՆ-ը սահմանափակել է իր դիվանագետների տեղաշարժն Իսրայելում՝ Իրանի հարձակման մտավախության պատճառով

Իսրայելում ԱՄՆ դեսպանատունը կարգադրել է իր աշխատակիցներին, «անվտանգության նկատառումներից ելնելով, չմեկնել Երուսաղեմից, Թել Ավիվից և Բիրշեբա քաղաքներից դուրս», գրում է BBC-ն։

Պետքարտուղարության խոսնակ Մեթյու Միլլերը լրագրողների հետ զրույցում չի բացահայտել նման նախազգուշական միջոցների պատճառները՝ հավելելով միայն, որ ԱՄՆ-ն ուշադիր հետևում է Մերձավոր Արևելքում, հատկապես, Իսրայելում սպառնալիքներին։

Նախօրեին ԱՄՆ նախագահ Ջո Բայդենը հայտարարել էր, որ Իրանը, ամենայն հավանականությամբ, պատրաստվում է հարվածներ հասցնել Իսրայելի թիրախներին՝ Դամասկոսում Իսլամական հեղափոխության պահապանների կորպուսի հրամանատարների վերջին սպանություններին ի պատասխան։ Սպիտակ տան ղեկավարը հավելել է, որ այս սպառնալիքների լույսի ներքո Իսրայելին ամերիկյան աջակցությունը կշարունակի մնալ «երկաթյա»։

Ըստ The Wall Street Journal-ի՝ Իսրայելն Իրանից ուղիղ հարձակում է ակնկալում առաջիկա 24-48 ժամվա ընթացքում։ Ենթադրվում է, որ հարձակման է ենթարկվելու երկրի հարավը կամ հյուսիսը։ Միևնույն ժամանակ, Axios-ի աղբյուրները նշում են, որ իրանական հարձակումը կսահմանափակվի՝ տարածաշրջանում իրավիճակի սրումը կանխելու համար։

Ապրիլի 1-ին իսրայելական ինքնաթիռները հարձակվել էին Դամասկոսում Իրանի հյուպատոսության վրա։ Սպանվել են Իսլամական հեղափոխության պահապանների կորպուսի յոթ անդամներ, այդ թվում՝ «Քուդս» ուժերի հրամանատար, գեներալ Մոհամմադ Ռեզա Զահեդին և գեներալ Մոհամմադ Հաջի Ռահիմին:

Հարվածից հետո Իրանի հոգևոր առաջնորդ այաթոլլա Ալի Խամենեին հայտարարել է, որ «Սիոնիստական ռեժիմը կպատժվի»։ Ապրիլի 7-ին Խամենեիի ռազմական խորհրդականը սպառնացել է, որ Իսրայելի դեսպանատներից ոչ մեկն «այլևս անվտանգ չէ»:

Նեթանյահուն ասել է, որ Իսրայելը պատրաստ է ցանկացած պատասխանի։

«Ով մեզ վնասում է կամ ծրագրում է վնասել, մենք կվնասենք նրանց»,- ասել է Իսրայելի վարչապետը։