30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
ԱՄՆ-ը պատժամիջոցներ է սահմանել Չինաստանից, ՌԴ-ից և ԱՄԷ-ից ընկերությունների նկատմամբ
Քաղաքականություն
11.04.2024 | 21:28
ԱՄՆ Առևտրի նախարարությունն արտահանման սահմանափակումներ է մտցրել Ռուսաստանից երեք, Չինաստանից վեց և Արաբական Միացյալ Էմիրություններից երկու ընկերությունների նկատմամբ։ Ընկերությունների ցանկը հրապարակվել է գերատեսչության կայքում, գրում է DW-ի ռուսական ծառայությունը։
Որոշման պատճառն այդ ընկերությունների մասնակցությունն է «Շահեդ» անօդաչու թռչող սարքերի բաղադրիչների ձեռքբերման հարցում, որոնք օգտագործվում են Ռուսաստանի կողմից Ուկրաինայի դեմ պատերազմում, ինչպես նաև Իրանի աջակցությունը վայելող Եմենի հութիների կողմից՝ Կարմիր ծովում նավերի վրա հարձակումներում:
«Նման գործողությունները հակասում են Միացյալ Նահանգների ազգային անվտանգության և արտաքին քաղաքականության շահերին»,- ասվում է նախարարության որոշման մեջ։
«Օդատիեզերական բաղադրիչների գնման ցանց ստեղծելու», այդ թվում՝ անօդաչու սարքերի արտադրության համար սև ցուցակում հայտնվել են Aerosila, Delta-Aero և UEC-Star ռուսական ընկերությունները։
Ըստ ամերիկյան գերատեսչության՝ «Շահեդ» օդաչու սարքերի բաղադրիչների գնմանը մասնակցել է նաև Shenzhen Jiasibo Technology չինական ձեռնարկությունը, որը նույնպես սահմանափակումների է ենթարկվել։
Պատժամիջոցներ են սահմանվել նաև չինական մի քանի ընկերությունների նկատմամբ, որոնք, ըստ ԱՄՆ իշխանությունների, «զբաղված են Չինաստանի ռազմական արդիականացման ծրագրերի համար արհեստական բանականության չիպերի մատակարարմամբ»։ Ի պատասխան՝ Պեկինը խոստացել է «անհրաժեշտ միջոցներ» ձեռնարկել չինական ընկերությունների շահերը պաշտպանելու համար։
ԱՄԷ-ից երկու ընկերություններ էլ սահմանափակումների են ենթարկվել ԱՄՆ-ից Իրան ապրանքների արտահանման համար՝ շրջանցելով Թեհրանի նկատմամբ կիրառված ամերիկյան պատժամիջոցները։
