Արևմտյան զենքն անհրաժեշտ է Ուկրաինային գոյատևման համար․ Զելենսկի

Ուկրաինան արևմտյան գործընկերներից չի ստանում այն զենքը, որն անհրաժեշտ է նրա գոյատևման համար։ Այս մասին հայտարարել է Ուկրաինայի նախագահ Վլադիմիր Զելենսկին Խարկովում գերմանական Bild-ին, Axel Springer կոնցեռնի այլ լրատվամիջոցներին տված հարցազրույցում, գրում է DW-ի ռուսական ծառայությունը։

«Մեր գործընկերներն ունեն որոշակի զենքեր, որոնք մեզ այսօր անհրաժեշտ են գոյատևման համար: Եվ ես պարզապես չեմ հասկանում, թե ինչու մենք չենք ստանում այդ զենքերը»,- ասել է Ուկրաինայի նախագահը։

Նա Գերմանիայից TAURUS հեռահար թևավոր հրթիռների մատակարարման հույս է հայտնել։ Փաստը, որ Գերմանիայի կանցլեր Օլաֆ Շոլցը, ինչպես նաև Բունդեսթագը մերժում են նման մատակարարումները, Զելենսկին բացատրում է նրանով, որ Բեռլինը վախենում է ՌԴ նախագահ Վլադիմիր Պուտինի միջուկային սպառնալիքներից։

«Որքանով ես հասկացա՝ կանցլերն ասում է, որ Գերմանիան միջուկային տերություն չէ, իսկ TAURUS-ն ամենաուժեղ սպառազինության համակարգն է Գերմանիայում»,- նշել է նա։

Բացի այդ, Զելենսկին նաև հույս է հայտնել, որ ԱՄՆ-ն, ամեն դեպքում, կհատկացնի ռազմական օգնության բազմամիլիարդանոց փաթեթը, որը երկար ժամանակ հավանություն չի ստանում ամերիկյան Կոնգրեսում։

Ըստ նրա՝ չնայած Ռուսաստանն առավելություն ունի զենքի և զինվորականների թվաքանակի առումով՝ «միասնական Արևմուտքն ունի ժամանակակից սպառազինության համակարգեր», որոնք կարող են թույլ տալ Ուկրաինային հաղթել ռուս ագրեսորին»։

Զելենսկին նաև ասել է, որ առաջիկայում Ուկրաինա կարող է ժամանել ԱՄՆ նախկին նախագահ Դոնալդ Թրամփը, որը հույս ունի կրկին ընտրվել երկրի ղեկավարի պաշտոնում։ Նա  նշել է, որ Թրամփը համաձայնել է Ուկրաինա այցելելու իր հրավերին, սակայն այցի ստույգ ժամկետը դեռ նշանակված չէ։

Ըստ Զելենսկիի՝ եթե անգամ Ուկրաինան պարտություն կրի պատերազմում, ինքը երկիրը չի լքի։

«Ես չեմ կարող լքել իմ երկիրը, ոչ մի դեպքում»,- հայտարարել է Ուկրաինայի նախագահը։