30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
ՌԴ ՊՆ-ն հայտնել է Ղրիմի մերձակայքում ոչնչացված «Նեպտուն» հրթիռի և խոցված ԱԹՍ-ների մասին
Քաղաքականություն
09.04.2024 | 14:41
Ռուսաստանի Պաշտպանության նախարարությունն ապրիլի 9-ի առավոտյան հայտնել է, որ բռնակցված Ղրիմի մերձակայքում «Նեպտուն» հրթիռ են խոցել, իսկ Վորոնեժի և Բելգորոդի շրջաններում անօդաչու թռչող սարքեր են որսացել, գրում է Current Time-ը։
Ռուսական ռազմական գերատեսչության տվյալներով՝ ուկրաինական «Նեպտուն» հականավային հրթիռը խոցվել է Սև ծովի վրա՝ բռնակցված Ղրիմի ափերի մոտ։
Ավելի վաղ Ռուսաստանի կողմից նշանակված նահանգապետ Միխայիլ Ռազվոժաևը հայտնել էր, որ բռնակցված Սևաստոպոլի մերձակայքում գտնվող ծովային տարածքի վրա գործարկվել է ցածր թռչող օդային թիրախի ավտոմատ ոչնչացման համակարգ։ Նրա խոսքով՝ քաղաքային ենթակառուցվածքները չեն վնասվել։
«Քաղաքում լսվող բարձր ձայների պատճառը ծովի վրայով ցածր թռչող օդային թիրախի ավտոմատ ոչնչացումն է: Քաղաքում ոչ մի ենթակառուցվածք չի տուժել, ամեն ինչ հանգիստ է»,- գրել է Ռազվոզժաևը:
Բացի այդ, ՌԴ ՊՆ-ն հայտնել է Վորոնեժի և Բելգորոդի շրջաններում չորս ինքնաթիռային տիպի անօդաչու թռչող սարքերի ոչնչացման մասին։ Բելգորոդի իշխանությունները կեսգիշերին մոտ հրթիռային տագնապ են հայտարարել և խնդրել են բնակիչներին հեռանալ պատուհանների մոտից կամ իջնել ապաստարաններ, տասը րոպե անց տագնապի ազդանշանն անջատվել է:
Վորոնեժի մարզի նահանգապետ Ալեքսանդր Գուսևն ավելի վաղ հայտնել էր նաև տարածաշրջանում ավիացիոն տիպի անօդաչու թռչող սարքի ոչնչացման մասին։ Զոհեր և վիրավորներ չկան։
