Թուրքիան դադարեցնում է մատակարարումները Ռուսաստան՝ ԱՄՆ-ի ու ԵՄ-ի պատժամիջոցների պատճառով

Վերջին երկու տարիների ընթացքում Թուրքիան և Չինաստանը դարձել են Ռուսաստանի համար ներմուծումների հիմնական կենտրոնները (Կենտրոնական Ասիայի երկրների հետ միասին): Դրանց միջոցով մեծ ծավալներով մատակարարվում էին ինչպես սպառողական ապրանքներ, այնպես էլ արդյունաբերական ու տեխնոլոգիական սարքավորումներ, այդ թվում՝ զենքի արտադրության համար անհրաժեշտ։ Բայց ԱՄՆ-ի (Թուրքիայի դեպքում՝ Եվրամիության) կողմից պատժամիջոցների պահպանման նկատմամբ վերահսկողության խստացման արդյունքում մինչև այս տարի իրականացված ապրանքների առատ հոսքերը սկսում են սպառվել։

Հինգշաբթի Թուրքիայի առևտրի նախարարության հրապարակած նախնական տվյալների համաձայն՝ Ռուսաստան արտահանումը, 2023 թվականի նույն ժամանակահատվածի համեմատ, առաջին եռամսյակում նվազել է 33,7%-ով: Մեքենաներ արտահանողների ասոցիացիան, որն ունի 22,000 անդամ, ակնկալում է մոտավորապես նույն անկումն ընթացիկ տարում։

Ոլորտի մատակարարումները կարող են կրճատվել 1 միլիարդ դոլարով՝ «ոչ միանշանակ» և «արագ ընդլայնվող» պատժամիջոցների պատճառով, հատկապես այն ապրանքների նկատմամբ, որոնք կարող են օգտագործվել զենք պատրաստելու համար, Bloomberg-ին ասել է ասոցիացիայի նախագահ Քութլու Կարավելիօղլուն:

Սպասվող անկման մասշտաբը, ըստ նրա, հավասար է նախորդ տարվա վաճառքի մեկ երրորդին, սակայն մինչ այժմ ամենաշատը տուժել է հաստոցների, վառելիքի պոմպերի և էլեկտրաշարժիչների արտահանումը Ռուսաստան։

«Մեքենաների որևէ լուրջ արտադրողի համար հնարավոր չէ պահպանել նույն հետաքրքրությունը Ռուսաստանի նկատմամբ՝ հաշվի առնելով բանկային համակարգի և մատակարարման շղթաների վրա աճող ճնշումը»,- պարբերականին պարզաբանել է Կարավելիօղլուն։