Իսրայելը մտադիր է ընդլայնել Գազայի հատված մարդասիրական օգնության հասանելիությունը

Իսրայելի իշխանությունները հավանություն են տվել Գազայի հատվածին օգնություն հասցնելու համար երկու նոր մարդասիրական միջանցքների բացմանը։ Որոշումն ընդունվել է այն բանից հետո, երբ ԱՄՆ նախագահ Ջո Բայդենը հեռախոսազրույց է ունեցել Իսրայելի վարչապետ Բենիամին Նեթանյահուի հետ և պահանջել, որ նա միջոցներ ձեռնարկի պաղեստինյան անկլավում խաղաղ բնակիչներին պաշտպանելու համար, գրում է BBC-ի ռուսական ծառայությունը։

Գազայի հատվածում ՀԱՄԱՍ-ի դեմ Իսրայելի պատերազմի մեկնարկից ի վեր առաջին անգամ ժամանակավորապես կբացվի Էրեզ անցումը, որը գտնվում է Գազայի հյուսիսային հատվածում։ Բացի այդ, Իսրայելը թույլ կտա Հորդանանից ավելի շատ մարդասիրական մատակարարումներ իրականացնել Քերեմ Շալոմ անցակետով։ Գազայի համար օգնություն կսկսի մատակարարվել նաև Իսրայելի Աշդոդ նավահանգիստ:

ԱՄՆ Ազգային անվտանգության խորհուրդը հայտարարել է, որ ողջունում է Իսրայելի կառավարության այս որոշումները և նշել, որ դրանք պետք է իրականացվեն «արագ և ամբողջությամբ»:

Հինգշաբթի երեկոյան Բայդենը և Նեթանյահուն կես ժամ հեռախոսով զրուցել են, ինչը, Սպիտակ տան հայտարարության համաձայն, անսովոր կոշտ խոսակցություն է եղել:

Երկու երկրների առաջնորդներն առաջին անգամ բանակցություններ են վարել այն բանից հետո, երբ Իսրայելի օդային հարվածը Գազայում սպանել է յոթ արևմտյան կամավորների, ովքեր աշխատում էին World Central Kitchen (WCK) բարեգործական կազմակերպությունում: Նեթանյահուն ասել է, որ զինվորականները «չկանխամտածված հարված» են հասցրել «անմեղ մարդկանց» և խոստացել անել ամեն ինչ, որպեսզի նման բան չկրկնվի։